حکومت پنجاب کے تحت کرکٹ چیمپئن شپ 28 ستمبر سے شروع

فیصل آباد(حمزہ اکرم)حکومت پنجاب کے ٹیلنٹ ہنٹ پروگرام کے تحت سینٹرل پنجاب سکول کرکٹ چیمپیئن شپ 28 ستمبر سے 11۔ اکتوبر تک چار مختلف کرکٹ گراؤنڈز میں کھیلی جائے گی جس میں ضلع بھر سے سرکاری ونجی سکولوں کی 19 ٹیمیں شرکت کررہی ہیں۔چیمپیئن شپ کی افتتاحی تقریب بوہڑانوالی گراؤنڈ میں منعقد ہوئی جس کے مہمان خصوصی ڈویژنل کمشنر زاہد حسین تھے۔ڈپٹی کمشنر عمران حامد شیخ بھی موجود تھے۔ڈویژنل کمشنرنے ڈپٹی کمشنر کی بال پر ہٹ لگااورفضا ء میں غبارے چھوڑ کر چیمپیئن شپ کا افتتاح کیا۔اس موقع پر سکولوں کے طالب علموں نے پی ٹی شو،جھومرڈانس جبکہ گھوڑا ڈانس نے افتتاحی تقریب کو چارچاند لگادیئے۔ٹورنامنٹ میں شریک ٹیموں نے مارچ پاسٹ پیش کیا۔ڈویژنل کمشنر اور ڈپٹی کمشنر نے ٹیموں کے کپتانوں میں سپورٹس کٹس ومتعلقہ سامان تقسیم کیا۔ڈویژنل کمشنر نے خطاب کرتے ہوئے افتتاحی تقریب کے کامیاب انعقاد پر ڈپٹی کمشنر اور ان کی پوری ٹیم کی کاوشوں کو سراہا۔انہوں نے کہا کہ وہ خود بھی کرکٹر رہے اور سپورٹس کی نفسیات کو سمجھتے ہیں۔انہوں نے کہا کہ سپورٹس آگے بڑھنے کی لگن اور جذبہ پیدا کرتی ہے اور تقریبا دو سال کورونا وباء کے باعث کھیلوں کے میدان ویران رہے لیکن سینٹرل پنجاب سکول کرکٹ چیمپیئن شپ کے انعقاد سے پوشیدہ ٹیلنٹ ابھر کر سامنے آرہا ہے۔انہوں نے ضلعی انتظامیہ کی طرف سے سپورٹس کلینڈر مرتب کرنے کے فیصلے کی تعریف کی اور اعلان کیا کہ یکم اکتوبر سے سمن آباد سپورٹس کمپلیکس میں قائم احساس سنٹر کو الفتح سپورٹس کمپلیکس کے زیر تعمیر ٹیبل ٹینس ہال میں منتقل کیا جارہا ہے تاکہ شہر کے وسط میں واقع سمن آباد سپورٹس کمپلیکس کو کھیلوں کے مقابلوں کے لئے بروئے کار لایا جاسکے۔انہوں نے ٹورنامنٹ میں شریک ٹیموں سے کہا کہ وہ میچز میں اپنی تمام تر صلاحیتں دکھائیں اور سپورٹس مین سپرٹ ان کا طرہ امتیاز ہونا چاہیے۔ڈپٹی کمشنر نے امید ظاہر کی کہ فیصل آباد کی ٹیم اس بار سینٹرل پنجاب سکول کرکٹ چیمپیئن شپ جیت کر لوٹے گی۔انہوں نے بھرپور سرپرستی اور تقریب میں شرکت پر کمشنر زاہد حسین کا شکریہ ادا کیا اور کہا کہ سپورٹس کلینڈر میں بوائز وگرلز کے مابین 25/25 مقابلے ہونگے اور پہلی بار تحصیلوں ودوردراز علاقوں میں بھی مقابلے شیڈول ہونگے جبکہ قومی اور صوبائی مقابلوں کی بھی میزبانی کریں گے۔انہوں نے بتایا کہ گزشتہ چیمپیئن شپ میں 10 جبکہ اس بار 19 ٹیمیں حصہ لے رہی ہیں۔انہوں نے بتایا کہ میچز بوہڑوالی گراؤنڈ، ڈویژنل پبلک سکول کرکٹ گراؤنڈ،سعید اجمل کرکٹ گراؤنڈ جھنگ روڈ اور ہائی پرفارمنس کرکٹ سنٹر چک 8 ج۔ب شہباز نگر میں کھیلے جائیں گے۔تحصیل سٹی سے 7،صدر سے 2،جڑانوالہ کی تین، تاندلیانوالہ کی دو،سمندری اور چک جھمرہ کی دو، دو ٹیمیں شامل ہیں۔افتتاحی تقریب میں ایڈیشنل ڈپٹی کمشنر ہیڈ کوارٹرز کاشف رضا اعوان،سی ای او ویسٹ مینجمنٹ کمپنی بلال فیروز جوئیہ،اسسٹنٹ کمشنر سٹی صاحبزادہ محمدیوسف،سی ای اوایجوکیشن علی احمد سیان،ڈویژنل سپورٹس آفیسر رانا حماد اقبال،ڈسٹرکٹ سپورٹس آفیسر ساجدہ لطیف،ڈی جی پی ایچ اے رائے نعیم اللہ،ایم ڈی واسا ابوبکر عمران،سپرنٹندنٹ ڈسٹرکٹ جیل اسد،پرنسپل ایم سی بوائز ہائر سیکنڈری سکول کوتوالی روڈ راؤ اقبال،چیئرمین آل پاکستان پرائیویٹ سکول الائنس صداقت حسین لودھی،پرنسپل ڈی پی ایس شاہد محمود،انچارج ضلعی ایمرجنسی آپریشنل سنٹر/فوکل پرسن محمد صادق،ماہر تعلیم محمد اختر بٹ،اساتذہ،طالب علم اور سپورٹس مین بھی شریک تھے۔