ساتویں گرلز چک بال چیمپیئن شپ پنجاب پولیس کی ٹیم نے سنسنی خیز اور کانٹے دار مقابلے کے بعد جیت لی۔

فیصل آباد(حمزہ اکرم)ایف ڈی اے پاکستان چک بال فیڈریشن اور سپورٹس ڈیپارٹمنٹ فیصل آباد کے اشتراک سے کریسنٹ سپورٹس کمپلیکس میں کھیلی جانیوالی تین روزہ ساتویں گرلز چک بال چیمپیئن شپ پنجاب پولیس کی ٹیم نے سنسنی خیز اور کانٹے دار مقابلے کے بعد جیت لی جس نے اپنی مدمقابل ٹیم پنجاب کلر کو51 کے مقابلے میں 53 سکور سے شکست دی۔ چیمپیئن شپ میں خیبرپختوخوا ہ کی ٹیم نے آزاد جموں وکشمیر کی ٹیم کو ہرا کر تیسری پوزیشن حاصل کی۔ فائنل میچ کے موقع پر کمشنر فیصل آباد سلوت سعید مہمان خصوصی تھیں۔ اس موقع پر ڈائریکٹر جنرل ایف ڈی اے /چیف آرگنائزر محمد آصف چوہدری، ڈویژنل سپورٹس آفیسر طارق نذیر، چیف انجینئر ایف ڈی اے مہرایوب، ڈائریکٹر ٹاؤن پلاننگ اسماء محسن اور ایف ڈی اے کے دیگر افسران کے علاوہ پاکستان چک بال فیڈریشن کے سیکرٹری جنرل عمانوئل اسد، نائب صدر محمداقبال، سیکرٹری رانا علیم، جوائنٹ سیکرٹری فیصل اسد ودیگر عہدیداران، کوچز اور چک بال کھیل کے شائقین بڑی تعداد میں موجود تھے۔ مہمان خصوصی کمشنر سلوت سعید جب فائنل میچ دیکھنے کیلئے پہنچیں تو ڈھول کی تھاپ پر جھومر پیش کرکے ان کا پرتپاک استقبال کیاگیااور خواتین کھلاڑیوں کا ان سے تعارف کرایاگیا۔ انہوں نے چک بال کے کھیل اور فائنل میچ میں ٹیموں کے شاندار کھیل کو بے حد سراہا۔ اس موقع پر اظہار خیال کرتے ہوئے کمشنر نے مختلف صوبوں اور دور دراز کے شہروں سے آئی ہوئی خواتین کھلاڑیوں کے عزم وہمت اور کھیلوں کے بھرپور جذبے کو خراج تحسین پیش کیا اور ان کی حوصلہ افزائی کرتے ہوئے اعلان کیا کہ فیصل آباد میں عنقریب چک بال کے انٹرنیشنل مقابلے منعقد کرانے کیلئے اقدامات کئے جائینگے۔انہوں نے نیشنل گرلز چک بال چیمپیئن شپ کے شاندار انعقاد پر ایف ڈی اے اوردیگر سپانسرز کی کاوشوں کو داد دی اور کہاکہ قومی سطح پر کھیلوں کے مقابلے سے قومی یکجہتی کے پیغام کو فروغ ملتا ہے اور خصوصی طور پر لڑکیوں کو اعلیٰ سطح کے مقابلوں میں شرکت کے مواقع فراہم کرنے سے ان کی صلاحیتوں کو نکھارنے اور خود اعتمادی پیداکرکے انہیں معاشرے میں بااختیار و خودمختار بنانے کے مقاصد حاصل کئے جاسکتے ہیں۔انہوں نے کہاکہ ڈویژنل انتظامیہ کی طر ف سے مختلف کھیلوں کے مقابلوں کے انعقاد کیلئے بھرپور معاونت کی جائیگی تاکہ صحت مند معاشرے کی بنیادیں مزید مضبوط ہوں۔قبل ازیں ڈائریکٹر جنرل ایف ڈی اے محمد آصف چوہدری نے بطور مہمان خصوصی شرکت کرنے پرکمشنر سلوت سعید کا شکریہ ادا کیااور کہاکہ چک بال کے کھیل کی ترویج و ترقی کیلئے ہمہ وقت کو شاں ہیں۔ انہوں نے ڈویژنل سپورٹس آفیسر طارق نذیر اور پاکستان چک بال فیڈریشن کے سیکرٹری جنرل عمانوئیل اسد اور دیگر عہدیداروں کی انتھک محنت، گہری دلچسپی اور ٹیموں کی عمدہ میزبانی کو سراہا۔انہوں نے چیمپیئن شپ کے انعقادمیں تعاون کرنے والے اداروں کا بھی شکریہ ادا کیا اور اس عزم کا اظہار کیاکہ چک بال کے کھیل کی سرکاری سطح پر توثیق کرانے اور اس کے فروغ کیلئے اقدامات کو کامیاب بنائیں گے۔ سیکرٹری جنرل پاکستان چک بال فیڈریشن عمانوئل اسد نے چیمپیئن شپ کے کامیاب انعقاد کے سلسلے میں ڈویژنل و ضلعی انتظامیہ، ایف ڈی اے اور دیگر سپانسرز کی معاونت کا شکریہ ادا کیااوراعادہ کیا کہ اس کھیل کے بین الاقوامی مقابلوں میں پاکستان کی بہترین نمائندگی کیلئے بھرپور تیار ی کی جائیگی۔ اس موقع پر ڈائریکٹر جنرل ایف ڈی اے محمد آصف چوہدری نے مہمان خصوصی کمشنر سلوت سعید کو یادگاری شیلڈ پیش کی جبکہ پوزیشن ہولڈرز ٹیموں میں انعامات تقسیم کئے۔آفیشیلز اور معاون کاروں کو بھی شیلڈ ز دی گئیں۔