ڈپٹی کمشنر کا کارڈیک کیئر یونٹ ڈسٹرکٹ ہیڈ کوارٹر ہسپتال کا دورہ

فیصل آباد(حمزہ اکرم)ڈپٹی کمشنر عمران حامد شیخ نے کارڈیک کیئر یونٹ ڈسٹرکٹ ہیڈ کوارٹرز ہسپتال کے داخلی راستہ کے قریب کھڑے پانی اور سوئی گیس لیکج ہونے کے معاملہ پرایکشن لیتے ہوئے فوری پی ایچ اے،سوئی گیس اور محکمہ صحت کے متعلقین کو طلب کرلیااور فوری عملدرآمد سے گیس لیکج ختم اور کنکشن کو دوبارہ فنکشنل کرنے کا حکم دیا جبکہ کھڑا پانی جو ڈینگی لاروا کی افزائش کا باعث بن رہا تھا اسے اپنی نگرانی میں کلیئر کرادیا۔ڈپٹی کمشنر نے سی سی یو کا دورہ کرکے دل کے عارضہ میں مبتلا مریضوں کو علاج معالجہ کی فراہم کی جانے والی طبی سہولیات کا جائزہ لیا۔انہوں نے مریضوں کی عیادت کرکے جلد صحت یابی کی دعا بھی کی اور ہسپتال کے جملہ انتظامی وطبی امور کو سراہا۔انہوں نے ڈاکٹر جاوید اقبال کو بہترین انداز میں سی سی یو چلانے پر ان کی خدمات کو خراج تحسین پیش کیا۔