ڈپٹی کمشنر علی عنان قمر کا عید الاضحی انتظامات کے حوالے سے انتظامی دفاتر کا دورہ

 فیصل آباد(ڈسٹرکٹ رپورٹر)ڈپٹی کمشنر علی عنان قمرنے عید الاضحی انتظامات اور شہر کی خوبصورتی کے حوالے سے پارکس اینڈ ہارٹیکلچر اتھارٹی،واسا اور ویسٹ مینجمنٹ کمپنی کے دفاتر کا دورہ کیا۔انہوں نے پارکس اینڈ ہارٹیکلچر اتھارٹی مین آفس میں میٹنگ کی صدارت کی جس میں ڈی جی پی ایچ اے ضمیر حسین اور مختلف شعبوں کے ڈائریکٹرز بھی شریک تھے۔ڈپٹی کمشنر نے پارکوں،چوکوں اور گرین بیلٹس کی تزئین وبحالی کے اقدامات پر بریفنگ لی اور کہا کہ شہر کو سرسبز وشاداب بنانے کے لئے تمام دستیاب وسائل بروئے کار لائے جائیں۔انہوں نے پی ایچ اے سے ریونیو جنریشن بارے بھی بریفنگ لی اورکہا کہ بزنس پلان کو حتمی شکل دی جائے۔ انہوں نے کہا کہ گرین ایریاز میں تجاوزات کے خاتمے کے لئے مہم شروع کی جائے۔انہوں نے گرین بیلٹس کی صفائی کرانے کی تاکید کی اور کہا کہ شجرکاری مہم پر عملدرآمد کیا جائے۔ڈپٹی کمشنر نے واسا ہیڈ کوارٹرز کا دورہ کیا اورمون سون سیزن میں ممکنہ بارشوں کے بعد اربن فلڈنگ سے بچاؤ کے لئے کی جانے والی تیاریوں کا جائزہ لیا۔انہوں نے واسا کی ریونیو ریکوری پر بریفنگ لی اور ہدایت کی کہ عید کے ایام میں سیوریج سسٹم کی بحالی کے لئے اقدامات ناگزیر ہیں۔انہوں نے کہا کہ واسا عوامی توقعات سے بڑھ کر سروسز فراہم کرے۔جائیکا کے تعاون سے جاری منصوبوں پر بریفنگ دی گئی۔ایم ڈی انجینئر خالد رضا نے واسا کی استعدادکار کے بارے میں آگاہ کیا۔انہوں نے دستیاب مشینری کی ورکنگ پر بریفنگ دی گئی۔ ڈپٹی کمشنر علی عنان قمرنے ایف ڈبلیو ایم سی کا بھی دورہ کیااورواسا،پی ایچ اے اور میونسپل کارپوریشن کے افسران کو بھی طلب کرلیا۔انہوں نے عید الاضحی صفائی پلان پر بریفنگ لی اور عید کے موقع پر محکموں کو ڈیوٹی سے آگاہ کیا گیا۔ویسٹ مینجمنٹ کمپنی درکار مشینری سے آگاہ کرے،اے ڈی سی ہیڈ کوارٹرز کاشف رضا اعوان کو انتظامات کا فوکل پرسن مقرر کیا گیا۔انہوں نے کہا کہ ٹال فری نمبر1139 کی تشہیر کی جائے جبکہ سیکرٹری یونین کونسلز کو عید پر ذمہ داریاں تفویض کریں۔انہوں نے بتایا کہ سری پائے جلانے اور قربانی کے جانوروں کے اعضاء نہروں وراجباہوں میں پھینکنے پر دفعہ 144کے تحت پابندی عائد کی گئی ہے خلاف ورزی کرنے والوں کے خلاف ایکشن ہوگا۔اجلاس میں سی او ویسٹ مینجمنٹ کمپنی نے صفائی پلان پر بریفنگ دی۔