پی پی 97 کا انوکھا ریکارڈ، 20 سال سے ہر الیکشن میں نیا چہرہ ایم پی اے منتخب

فیصل آباد (افضال تتلہ) چک جھمرہ کے حلقہ پی پی 97 کا انوکھا ریکارڈ سامنے آگیا ۔ 2002ء سے لے کر 2022ء تک ہر الیکشن میں پرانے کی بجائے نیا امیدوار جیتا ۔ 20 سالوں میں کسی کو دوسری باری نہ مل سکی۔ تفصیلات کے مطابق تحصیل چک جھمرہ کی سیاسی تاریخ بھی مستقل مزاج ثابت نہ ہوسکی۔ 2002ء میں سپیکر پنجاب اسمبلی چوہدری محمد افضل ساہی کو 2008ء کے جنرل الیکشن میں حاجی لیاقت علی نے پاکستان پیپلز پارٹی کے ٹکٹ پر الیکشن لڑ کر 44893 ووٹ حاصل کرکے ہرا دیا جبکہ 2013ء میں مسلم لیگ ن کی ٹکٹ پر سیاسی میدان میں آنے والے آزاد علی تبسم کو چک جھمرہ نے 39676 ووٹ ڈال کر ممبر صوبائی اسمبلی منتخب کرلیا۔ اسی حلقہ کے جنرل الیکشن 2018 میں حاجی اجمل چیمہ کو 42237 ووٹ ڈال کر ایک اور نئے چہرے کو ایم پی اے بنا لیا گیا۔ اب حالیہ ضمنی انتخاب 2022ء میں علی افضل ساہی کو 67022 ووٹ دے کر اس حلقہ نے اپنا ایم پی اے منتخب کرلیا ہے اور یوں صوبائی اسمبلی کی سیٹ پھر سے ساہی خاندان میں منتقل ہوچکی ہے ۔ اسے عوامی شعور ہی کہا جاسکتا ہے کہ عوام نے امیدوں پر پورا نہ اترنے والے امیدوار کو دوبارہ منتخب کرنا مناسب نہ سمجھا اور نئے چہرے کو سامنے لے آے۔ اگر حالات ایسے ہی رہے تو ممکن ہے آنے والے الیکشن میں اس حلقہ کا ایم پی اے کوئی اور نیا چہرہ ہو۔ نئے منتخب ہونے والے علی افضل ساہی کو کوشش کرنا ہوگی کہ وہ اس روایت کو توڑ کر دوسری بار منتخب ہوں اس کے لیے انھیں دن رات ایک کرنا ہوگا عوامی حمایت کو بڑھانا ہوگا ۔