فیصل آباد(حمزہ اکرم)زرعی یونیورسٹی میں یو ایس ایڈ کے میرٹ اور ضرورت پر مبنی سکالرشپ پروگرام کے تحت 57 طالبات میں وظائف کے سرٹیفکیٹس تقسیم کیے گئے۔ ڈائریکٹر ایجوکیشن یو ایس ایڈ اینی فلیکر نے زرعی یونیورسٹی فیصل آباد کے وائس چانسلر پروفیسر ڈاکٹر اقرار احمد خاں کے ہمراہ جامعہ زرعیہ کی طالبات میں سرٹیفکیٹس تقسیم کئے۔سنٹر فار ایڈوانسڈ سٹڈیز میں منعقدہ تقریب سے خطاب کرتے ہوئے اینی فلیکر نے کہا کہ یو ایس ایڈ نیڈ بیس سکالر شپ پروگرام کے تحت اب تک زرعی یونیورسٹی فیصل آباد کے 459 طلباء کو سکالرشپ فراہم کیے جاچکے ہیں اور یو ایس ایڈ پاکستان میں ہائیر ایجوکیشن کے فروغ کیلئے تمام ممکنہ اقدامات عمل میں لا رہا ہے۔ پاکستان کی 30 یونیورسٹیاں یو ایس ایڈ کے ساتھ شراکت دار ہیں۔ انہوں نے کہا کہ زرعی یونیورسٹی فیصل آباد کی زرعی تعلیم،تحقیق اور کمیونٹی سروسز میں کاشوں کو نہ صرف ملکی سطح پر بلکہ غیر ملکی سطح پر بھی سراہا جاتا ہے۔ڈاکٹر اقرار احمد خاں نے کہا کہ خواتین کی سماجی و اقتصادی سرگرمیوں میں بھرپور شرکت کے بغیر ملک ترقی کی منازل طے نہیں کر سکتا۔ انہوں نے کہا کہ زرعی یونیورسٹی فیصل آباد میں 50 فیصد سے زائد طالبات زیر تعلیم ہیں اور یونیورسٹی خواتین کے حقوق کے تحفظ اور خواتین کو بااختیار بنانے کے لیے ہر ممکن اقدامات کر رہی ہے۔ زرعی یونیورسٹی فیصل آباد میں دیہی علاقوں سے تعلق رکھنے والے طلباء کیلئے کوٹہ مختص کیاگیا ہے تاکہ دیہات سے تعلق رکھنے والے افراد کو بین الاقوامی معیار کی تعلیم دے کر ٹھوس زرعی ترقی کی بنیاد رکھی جا سکے۔ ڈائریکٹر فنانشل اسسٹنٹ اینڈ یونیورسٹی ایڈوانسمنٹ زرعی یونیورسٹی فیصل آباد ڈاکٹر محمد احسن خاں نے کہا کہ یونیورسٹی ضرورت مند طلباء تعلیم کا سفر جاری رکھنے کیلئے بیشمار سکالر شپ فراہم کر رہی ہے۔ تاکہ ان کے ذہن و قلوب کو علم کی روشنی سے منور کرتے ہوئے زندگی میں کامیابیاں و کامرانی سمیٹنے کے وسیع مواقع فراہم کئے جائیں۔ اس موقع پر ایچ ای سی کے ڈائریکٹر یو ایس ایڈ پروجیکٹ محمد اظہر خاں، اسسٹنٹ ڈائریکٹر فنانشل اسسٹنس زرعی یونیورسٹی فیصل آباد وقار اکبر اور دیگر معززین نے بھی خطاب کیا۔
