اراضی ریکارڈ سنٹرز کی سروسز کا معیار مزید بہتر بنایا جائے۔ ڈپٹی کمشنر

فیصل آباد(حمزہ اکرم)ڈپٹی کمشنرعبداللہ نیئر شیخ نے ہدایت کی ہے کہ اراضی ریکارڈ سنٹرز کی سروسز کا معیار مزید بہتر بنایا جائے تاکہ لوگوں کا اعتماد مضبوط ہو۔انہوں نے یہ ہدایت اراضی ریکارڈ سنٹر تاندلیانوالہ کے دورہ کے موقع پر کہی۔ڈپٹی کمشنر نے اراضی ریکارڈ سنٹر میں سروسز لینے آئے ہوئے درخواست گزاروں سے ملاقات کی اور ان سے سنٹر کی کارکردگی بارے دیافت کرتے ہوئے کہا کہ اراضی ریکارڈ سنٹرز سائلان کی سہولت کے اعتبار سے بہتر کارکردگی کے حامل ہونے چاہیں۔اس ضمن میں انچارج اپنی ذمہ داریوں کا ادراک کریں۔انہوں نے انتظارگاہ میں درخواست گزاروں کے بیٹھنے اور پینے کے پانی کی دستیابی کے انتظامات بھی چیک کئے۔انہوں نے کہا کہ سنٹرزمیں اعلی نظم و نسق کو ہمہ وقت برقرار رکھا جائے اور سنٹرز سے رابطہ کرنے والے شہریوں کو انتظار کی زحمت سے بچاتے ہوئے ان کے کام تیزی رفتاری سے نمٹائے جائیں۔انہوں نے کہا کہ کاؤنٹرز پر لمبی قطاریں نظر نہیں آنی چاہیں اور رش کی صورت میں متعلقہ کاؤنٹر کی تعداد میں اضافہ کریں۔انہوں نے کہا کہ سائلان کی رہنمائی کے لئے انفارمیشن ڈیسک کو ہمہ وقت فعال رکھیں تاکہ درخواست گزاروں کا وقت ضائع نہ ہو اور وہ اپنے کام کے سلسلے میں صحیح کاؤنٹر پر رابطہ کریں۔انہوں نے سنٹرپر صفائی ستھرائی کے اعلی معیار کو ہمہ وقت برقرار رکھنے کی تاکید کی۔ڈپٹی کمشنر نے کہا کہ کرپشن کو قطعا برداشت نہیں کیا جائے گا اور انچارج اپنے ماتحت عملہ کی پرفارمنس اور سائلان سے طرز عمل پر گہری نظر رکھیں۔انہوں نے کہا کہ سنٹرپر درپیش مسائل کی فہرست اور ان کے حل کے لئے تجاویز مرتب کرکے ڈی سی آفس کو پیش کریں۔ڈپٹی کمشنر نے تحصیل ہیڈ کوارٹرز ہسپتال کا بھی دورہ کیا اورمریضوں کو فراہم کی جانے والی طبی سہولیات کا جائزہ لیا۔انہوں نے ایئرکنڈیشنڈکے فعال،ادویات کا ریکارڈ اور صفائی ستھرائی کے ساتھ مشینری کی ورکنگ حالت کو چیک کیا اور طبی وانتظامی امور کو چوکس رکھنے کی ہدایت کی۔انہوں نے رورل ہیلتھ سنٹر ستیانہ کا بھی اچانک دورہ کیا اور مریضوں کو فراہم کی جانے والی طبی سہولیات کا جائزہ لیا۔ڈپٹی کمشنر نے سپورٹس کمپلیکس کا دورہ کرکے نوجوانوں کو کھیلوں کی فراہم کی جانے والی سہولیات کا جائزہ لیا۔