سانحہ جڑانوالہ کے متاثرہ مسیحی خاندانوں کی سوفیصد بحالی تک چین سے نہیں بیٹھیں گے۔ ڈپٹی کمشنر

فیصل آباد(حمزہ اکرم)ڈپٹی کمشنرعبداللہ نیئر شیخ نے کہا ہے کہ سانحہ جڑانوالہ کے متاثرہ مسیحی خاندانوں کی سوفیصد بحالی تک چین سے نہیں بیٹھیں گے۔انہوں نے کہا کہ متاثرین سانحہ جڑانوالہ کے بچوں خوشگوار ماحول میں تعلیمی سرگرمیاں جاری رکھنے کے لئے بھی متحرک ہیں اس ضمن میں طالب علموں کو تعلیم جاری رکھنے کے سلسلے میں کتابیں اور سکول بیگزکی فراہمی یقینی بنائی گئی ہے۔انہوں نے یہ بات نگران وزیراعلی پنجاب محسن نقوی کی ہدایات پر جڑانوالہ کا ہنگامی دورہ کرکے گورنمنٹ ایم سی گرلز ہائی سکول سینما چوک میں زیرتعلیم طالبات سے ملاقات اور ان میں کتابیں وبیگز تقسیم کرتے ہوئے کہی۔ڈپٹی کمشنر نے کہا کہ تعلیم ہر بچے کا بنیادی حق ہے اور متاثرین سانحہ جڑانوالہ کے مسیحی خاندانوں کے بچوں اور بچیوں کو سکولوں میں ہر ممکن تعلیمی سہولیات کی فراہمی یقینی بنائی جارہی ہے۔انہوں نے طالبات سے گفتگو کرتے ہوئے کہا کہ وہ یکسوئی سے اپنی تعلیم پر توجہ دیں۔ڈپٹی کمشنر نے اساتذہ سے کہا کہ طالبات کی تعلیم وتربیت پر خصوصی توجہ مرکوز کریں۔انہوں نے سکول کے دیگر کلاس رومز کا بھی دورہ کیا اور طالبات سے تعلیمی سلیبس کے حوالے سے بات چیت کی۔ڈپٹی کمشنر چمڑا منڈی اور دیگر مسیحی آبادیوں میں بھی گئے اور گرجاگھروں کی جاری تزئین وبحالی کے کاموں کا جائزہ لیتے ہوئے باقی ماندہ کام تیز رفتاری سے مکمل کرنے کی تاکید کی۔انہوں نے مسیحی مردوخواتین سے بھی ملاقات کی اور انہیں یقین دلایا کہ ضلعی انتظامیہ ان کی مکمل آبادکاری تک ان کے شانہ بشانہ کھڑی ہے۔انہوں نے آبادیوں میں میڈیکل کیمپس کا بھی دورہ کیا اور ادویات کی دستیابی کوچیک کیا۔انہوں نے اسسٹنٹ کمشنر کو مسیحی آبادیوں کے دورے کرکے سہولیات کی فراہمی کو یقینی بنانے کی تاکید کی۔انہوں نے سی ای او ایجوکیشن کاشف ضیاء سے کہا کہ وہ بوائز وگرلز سکولوں کے وزٹ کرکے تعلیمی سرگرمیاں کا مرحلہ وار جائزہ لیں اور خوشگوارماحول ہمہ وقت برقراررکھا جائے۔