تعلیمی ترقی قوموں کے عروج کی ضمانت ہے۔ کمشنر سلوت سعید

فیصل آباد(حمزہ اکرم)کمشنر سلوت سعید نے کہا ہے کہ تعلیمی ترقی قوموں کے عروج کی ضمانت ہے،طالب علموں کو عصرحاضر کے تقاضوں سے ہم آہنگ تعلیم وقت کی ضرورت ہے۔انہوں نے امتحان انٹرمیڈیٹ پارٹ سیکنڈ و کمپوزٹ سالانہ (اول) 2023ء میں پوزیشن حاصل کرنے والے طالب علموں کو مبارک باد دیتے ہوئے کہا کہ وہ پاکستان کے سنہرے مستقبل کی نوید ہیں۔انہوں نے کہا کہ اساتذہ کرام طالب علموں کی کردار سازی پر بھی بھرپور توجہ دیں۔ان خیالات کا اظہارانہوں نے نتیجہ کو آن لائن کرنے کی تقریب سے خطاب کرتے ہوئے کیا۔انہوں نے کمپیوٹر کا بٹن دبا کر نتیجہ کا اعلان کیاجس کے ساتھ ہی رزلٹ بورڈ کی ویب سائٹ www.bisefsd.edu.pkپر بھی اَپ لوڈ ہو گیا۔سیکرٹری بورڈ ڈاکٹر حبیب الرحمن،کنٹرولر امتحانات ڈاکٹر محمد جعفر علی، ڈائریکٹر کالجز ڈاکٹر کلثوم اختر،پی آراو بورڈ رضوان احمد جوئیہ،پی ایس ٹو چیئرپرسن احسان احمد،آفتاب احمداور ساجد حسین نقوی کے علاوہ دیگر متعلقہ افسران شریک ہوئے۔کنٹرولر امتحانات نے بتایا کہ امتحان انٹرمیڈیٹ پارٹ سیکنڈ و کمپوزٹ سالانہ (اول) 2023 ء میں کل 99874طلباء وطالبات شریک ہوئے جن میں سے 65837پاس ہوئے اور یوں کامیابی کا تناسب 65.92فیصد رہا۔انہوں نے بتایا کہ فیصل آباد،جھنگ،ٹوبہ ٹیک سنگھ اور چنیوٹ اضلاع کے طلباء وطالبات کیلئے ان کے گھروں کے نزدیک 360،الگ الگ امتحانی مراکز قائم کئے گئے تھے تاکہ امیدواران کو امتحانی مراکز پہنچنے میں کسی دشواری کا سامنا نہ کرنا پڑے۔ انہوں نے کہا کہ امتحان انٹرمیڈیٹ (سیکنڈ) سالانہ 2023ء کا آغاز 20۔اکتوبر2023ء سے ہو گا جس کیلئے سنگل فیس کے ساتھ داخلہ فارم 14 ستمبر تا 25 ستمبر،دوگنا فیس کے ساتھ 26 ستمبر تا 29 ستمبراور تین گنا فیس کے ساتھ 30 ستمبر تا 3 0،اکتوبر2023ء تک ایجوکیشن بورڈ فیصل آباد میں جمع کرائے جا سکیں گے۔کمشنر/ چیئرپرسن بورڈ نے کہا کہ طلباء وطالبات کو ری چیکنگ کی سہولت بھی میسر ہے ایسے بچے جنہیں اپنے حاصل کردہ نمبروں سے متعلق بے یقینی ہوتو وہ رزلٹ آنے کے بعد 15 دن کے اندر ری چیکنگ کیلئے درخواست دے کر اپنی جوابی کاپی خود چیک کرکے تسلی کر سکتے ہیں۔چیئرپرسن بورڈ نے شاندار،بروقت اور غلطیوں سے پاک رزلٹ تیار کرنے پر سیکرٹری بورڈ ڈاکٹر حبیب الرحمن اور ان کی ٹیم کی کاوشوں کو سراہا۔