پی پی 97 میں پریزائیڈنگ افسران اور عملے میں پولنگ میٹریل تقسیم

فیصل آباد (افضال احمد تتلہ) کل مورخہ 17 جولائی کو ہونے والے ضمنی الیکشن کے سلسلہ میں ریجنل الیکشن کمیشن آفس کی طرف سے ہائر سیکنڈری اسکول جھمرہ میں پولنگ میٹریل کی تقسیم کا عمل جاری ہے ۔ پی پی 97 کے 168 پولنگ اسٹیشنز کے عملے کو میٹریل تقسیم کیا جا رہا ہے۔ الیکشن کمیشن کے افسران اور پولیس کی نگرانی میں پریزائیڈنگ افسران کو پولنگ اسٹیشنز کی جانب روانہ کیا جا رہا ہے۔ پی پی 97 میں 2 لاکھ 55 ہزار 884 مجموعی طور پر رجسٹرڈ ووٹرز ہے۔ پی پی 97 میں 12 امیدوار آمنے سامنے ہیں جن میں پاکستان تحریک انصاف کے علی افضل ساہی اور ن لیگ کے محمد اجمل چیمہ میں کانٹے دار مقابلہ متوقع ہے ۔ اداروں کی طرف سے جھمرہ کے 168 میں سے 39 پولنگ اسٹیشنز حساس قرار دئیے گئے ہیں جبکہ پی پی 97 کے 168 پولنگ اسٹیشنز پر پانچ ہزار سے زائد پولیس اہلکاروں کو تعینات کیا گیا ہے۔ اسی دوران ایلیٹ فورس کی گاڑیاں بھی حلقہ میں گشت کرتی رہیں گی۔