کمشنر فیصل آباد کا لائلپور میوزیم کا دورہ

فیصل آباد(ڈسٹرکٹ رپورٹر) کمشنر سلوت سعید نے کہا ہے کہ لائلپور میوزیم علاقہ کی تہذیب و ثقافت اور تاریخی پس منظر کا آئینہ دار ہے جس کو تزئین و ترتیب،نوادرات اور معلومات کے اعتبار سے جامع اور مستقبل کے تقاضوں کے مطابق پائیدار بنیادوں پر استوار کیا جائے۔انہوں نے یہ بات لائلپور میوزیم کے دورے کے دوران مختلف گیلریز کا معائنہ کرتے ہوئے کہی۔کمشنر نے کہا کہ ساندل بار اور اردگرد کے علاقوں کی تاریخی و ثقافتی حیثیت،آثار قدیمہ،نامور شخصیات کی اپنے شعبوں میں خدمات،جغرافیائی صورتحال،علاقائی ترقی کے مراحل اور ماضی کے دیگر مختلف حوالوں سے آگاہی کیلئے لائلپور میوزیم بڑی اہمیت کا حامل ہے۔ کمشنر نے عجائب گھر کی صفائی ستھرائی کی صورتحال پر اطمینان کا اظہار کیا اور کہا کہ میوزیم کا رخ کرنے والوں کو خوشگوار ماحول میسر آنا چاہیے۔انہوں نے کہا کہ لائلپور میوزیم کو معلوماتی و تاریخی اعتبار سے مزید جامع اور وسیع بنانے کیلئے تحقیق و دریافت کی کوششوں کو جاری رکھا جائے۔انہوں نے کہا کہ ہر گیلری میں موجود نادراشیاء کے بارے میں اٹنڈنٹ کو مکمل معلومات ہونی چاہیں۔اس موقع پر شہناز محمود نے کمشنر کو میوزیم میں رکھی گئی نوادرات اور ارتقائی پہلوؤں کے بارے میں بریفنگ دی۔