فیصل آباد(ڈسٹرکٹ رپورٹر) ڈپٹی کمشنر علی عنان قمرنے سبزی منڈی سدھار کا دورہ کیا اور مختلف شیڈز میں جاکر پھلوں وسبزیوں کی بولیوں کے عمل اور تھوک قیمتوں کا جائزہ لیا۔ انہوں نے بولیوں کے طریقہ کار کا جائزہ لیتے ہوئے سبزیوں و پھلوں کی قیمتوں اور ان کی مقدار کو چیک کیا۔انہوں نے بولیوں کا تقابلی جائزہ لیتے ہوئے واضح کیا کہ کسی پھل یا سبزی کی بے جا اور بلاجواز قیمت بڑھانے کی کوشش نہ کی جائے۔انہوں نے کہا کہ عوام کو بے جامہنگائی کے رجحان سے بچانے کے لئے سبزی منڈیوں میں بولیوں کی نگرانی کی جارہی ہے۔کسی آڑھتی کو بلا جواز تھوک قیمت بڑھانے کی اجازت نہیں دی جائے گی۔ ڈپٹی کمشنر کسان پلیٹ فارم پر بھی گئے اور وہاں پرائس لسٹ کی موجودگی و دیگر سہولیات کو چیک کیا۔انہوں نے دکانداری کے لئے خریداری کرنے والوں سے بولیوں کی شرائط اور معیار کے بارے میں دریافت کیااورسبزی منڈی میں صفائی کا بھی جائزہ لیا،بعض جگہوں پر کوڑے کے ڈھیروں کی موجودگی پر برہمی کا اظہار کرتے ہوئے صاف ستھرا ماحول ہمہ وقت قائم رکھنے کا حکم دیا۔انہوں نے سبزی منڈی سے ملحقہ اندرونی روڈز کی مرمت وبحالی کا بھی جائزہ لیا۔
