ایف۔ڈے۔اے کا ملکیتی پلازہ کی دکانات کو کرایہ پر دینے کا فیصلہ

فیصل آباد(ڈسٹرکٹ رپورٹر) فیصل آباد ڈویلپمنٹ اتھارٹی (ایف ڈی اے)نے نیلام عام کے ذریعے مختلف دکانات کے لئے مختص اراضی، نجی ہاؤسنگ سکیموں میں پبلک یوٹیلٹی کے پلاٹس کو فروخت اور اپنے ملکیتی پلازہ کی دکانات کو کرایہ پر دینے کا فیصلہ کیاہے اس سلسلے میں نیلامی 25مئی 2023کو ایف ڈی اے کمپلیکس نزد سول ہسپتال میں منعقدہوگی۔ ڈائریکٹر اسٹیٹ مینجمنٹ iسہیل مقصود پنوں کے مطابق مختلف رقبہ جات کی جن جائیدادوں کی فروخت کیلئے نیلامی میں پیش کیا جائے گا ان میں احمد نگر 99محلہ شاپس اور کمرشل سنٹر احمد نگر کی 49 دکانات کی اراضی شامل ہے جبکہ آٹھ مختلف نجی ہاؤسنگ سکیموں میں پبلک یوٹیلٹی کے پلاٹس نیلام عام کے ذریعے فروخت کئے جائینگے جو تعلیم وصحت کی سہولیات فراہم کرنے کیلئے مختص کئے گئے ہیں۔ زیادہ سے زیادہ ساڑھے چار کنال سے لیکر کم ازکم دس مرلہ تک رقبہ جات کے یہ پلاٹس خالد ٹاؤن چک نمبر7ج ب،گرین ویلی چک نمبر234رب،میڈوز فیز iچک نمبر234رب، آرچرڑہومز چک نمبر239،عثمان بلاک چک نمبر120ج ب، ریاض الجنہ چک نمبر7ج ب، فورسیزن فیزiiچک نمبر234رب اور پرائم سٹی چک نمبر239رب میں واقع ہیں۔ڈائریکٹر اسٹیٹ مینجمنٹ نے بتایاکہ گلستان کالونی ملت روڈ پر واقع ایف ڈی اے کی ملکیتی گلستان کالونی میں اپرگراؤنڈ فلور، فسٹ فلور اور سکینڈفلور کے ہالز، اپر گراؤنڈ فلور پر 256مربع فٹ رقبہ کی منتخب دکانات کرایہ پر دینے کیلئے بھی نیلام عام میں رکھی گئی ہے۔ انہوں نے کہاکہ نیلامی میں شامل جائیدادوں کی تفصیلات اور بولی کی شرائط کی معلومات کیلئے ایف ڈی اے کے دفتر سے رابطہ کیاجاسکتاہے۔