ایف ڈی اے کے نیلام عام کے لیے انتظامات مکمل

فیصل آباد(ڈسٹرکٹ رپورٹر) ایف ڈی اے کے زیر اہتمام نیلام عام کے ذریعے 148دکانوں اور آٹھ یوٹیلٹی سروسز پلاٹس کی فروخت اور ملکیتی پلازہ کی اٹھارہ دکانات و تین ہالز کو کرایہ پر دینے کیلئے نیلامی کے تمام تر انتظامات مکمل کرلئے گئے ہیں۔یہ نیلامی 25مئی 2023کو ایف ڈی اے کمپلیکس نزد سول ہسپتال میں صبح گیارہ بجے منعقد ہورہی ہے۔ ڈائریکٹر جنرل ایف ڈی اے محمد آصف چوہدری نے ایک اجلاس کے دوران ان جائیدادوں کے نیلام عام کے انتظامات کاجائزہ لیا۔ ایڈ یشنل ڈائریکٹر جنرل عابد حسین بھٹی، ڈائریکٹر اسٹیٹ مینجمنٹ iسہیل مقصود پنوں اور نیلام کمیٹی کے دیگر افسران اجلاس میں موجود تھے۔اس موقع پر بتایاگیاکہ نیلام عام میں احمد نگر کی 99 محلہ شاپس اورکمرشل سنٹر کی 49 دکانات جبکہ مختلف پرائیویٹ ہاؤسنگ سکیموں میں تعلیم وصحت کی سہولیات کیلئے مختص آٹھ پلاٹس فروخت کیلئے پیش کی جائیں گے جبکہ گلستان کالونی ملت روڈ پر واقع گلستان پلازہ کے اپر گراؤنڈ فلور پر واقع دکان نمبر1تا16 اور دکان نمبر 74،8 جبکہ اپر گراؤنڈ، فرسٹ اور سکینڈ فلور کے ہالز کرایہ پر دینے کیلئے بولی میں رکھے جائینگے۔ ڈائریکٹر جنرل نے ہدایت کی کہ بولی کے تمام عمل کو مکمل منظم اور شفاف رکھاجائے اس سلسلے میں بولی دھندگان کو ہر ممکن سہولیات فراہم کی جائیں۔ انہوں نے کہاکہ نیلام کمیٹی کی موجودگی کویقینی بنایاجائے اور بولی سے قبل تمام تر شرائط و تفصیلات سے متعلق خواہش مند بولی دھندگان کو آگاہ کردیاجائے۔انہوں نے کہاکہ ان منتخب جائیدادوں کی فروخت کی بدولت ایف ڈی اے کی مالی پوزیشن مستحکم اور شہری تعمیروترقی کے منصوبوں کیلئے وسائل دستیاب ہوں گے۔اجلاس کے دوران ڈائریکٹر اسٹیٹ مینجمنٹ سہیل مقصود پنوں نے نیلام عام کے طریقہ کار اور شرائط کے بارے میں بتایا۔ انہوں نے بتایاکہ ہربولی دھندہ کو نیلامی سے قبل زرضمانت بینک ڈرافٹ / پے آرڈر کی صورت میں جمع کراناہوگا جبکہ موقع پر نقد رقم وصول کرنے کی سہولت بھی فراہم کی گئی ہے۔ انہوں نے بتایاکہ دیگر شرائط کے مطابق خریدے گئے پلاٹ/ دکان کو طے شدہ امور کے علاوہ کسی دیگر مقاصد کے لئے استعمال نہیں کیاجاسکے گا۔