ملت ٹاؤن کے رہائشیوں کے لیے اچھی خبر

فیصل آباد(ڈسٹرکٹ رپورٹر)ایڈ یشنل ڈائریکٹر جنرل عابد حسین بھٹی نے ہدایت کی ہے کہ رہائشی سہولیات اور انتظامی امور سے متعلق ملت ٹاؤن کے مکینوں کے مسائل ترجیحی بنیادوں پر حل کریں اس ضمن میں کوئی درخواست یا مسئلہ زیر التواء نہیں رہنا چاہئے۔ انہوں نے یہ ہدایت ملت ٹاؤن کے مکینوں کے نمائندہ افراد سے ملاقات کے دوران جاری کی۔ڈائریکٹر اسٹیٹ مینجمنٹ سہیل مقصود پنوں ودیگر افسران بھی موجود تھے۔ ایڈ یشنل ڈائریکٹر جنرل نے ملت ٹاؤن سے آنے ہوئے افراد کے مسائل سنے اور انہیں حل کرنے کا یقین دلایا۔ انہوں نے کہاکہ ایف ڈی اے کے زیر کنٹرول رہائشی کالونیوں اور کمرشل مارکیٹس کی جائیدادوں کی منتقلی، بلڈنگز پلان کی منظوری، کمرشلائزیشن، این اوسی کے اجراء اور دیگر محکمانہ امور کی انجام دہی کے ساتھ ساتھ ترقیاتی سرگرمیوں پر گہری توجہ ہے تاہم دفتری طریقہ کار کومزید آسان بنانے کیلئے نئی اصلاحات کے نفاذ کے علاوہ ریکارڈ کی ڈیجیٹلائزشن مکمل کی جارہی ہے اورآئندہ جائیدادوں کے مالکان کو جائیدادوں کی تفصیلات پر مبنی سمارٹ کارڈز جاری کئے جارہے ہیں۔ انہوں نے بتایاکہ ایف ڈی اے ہیلپ لائن 1237کے ذریعے ایف ڈی اے کی سروسز کے بارے میں گھر بیٹھے معلومات حاصل کی جاسکتی ہیں۔انہوں نے کہاکہ محکمانہ سروسز سے متعلق تیزرفتار ریلیف کی فراہمی کیلئے کوشاں ہیں اور کسی بھی شکایت کے ازالہ کیلئے فوری اقدامات کئے جارہے ہیں۔انہوں نے متعلقہ افسران کو ہدایت کی کہ ملت ٹاؤن کی تعمیروترقی اور وہاں کے مکینوں کی سہولیات کیلئے کوئی کسر اٹھانہ رکھی جائے۔ انہوں نے ٹاؤن پلاننگ رپورٹس کے اجراء کیلئے تیز رفتار دفتری عمل مکمل کرنے کی تاکید اورکہاکہ جائیدادوں کی منتقلی کیلئے فریقین کو ہرممکن آسانی اورسہولیات فراہم کی جائیں اس ضمن میں تاخیر یا رکاوٹ کا موجب بننے والے ملازمین کا محاسبہ ہوناچاہیے۔ ملت ٹاؤن کے نمائندہ افراد نے خندہ پیشانی سے مسائل سنے اور ان کے حل کیلئے اقدامات کرنے پر ایڈ یشنل ڈائریکٹر جنرل ایف ڈی اے کا شکریہ ادا کیا۔