فیصل آباد(حمزہ اکرم)ضلعی انتظامیہ کی تحریک پر اہلیان فیصل آباد کی طرف سے سوات(خیبرپختونخواہ)کے سیلاب متاثرین کے لئے گرم کپڑوں وبستروں،کھانے پینے اور ضروریات زندگی کے دیگر سامان پر مشتمل 8 ٹرک روانہ کردیئے گئے۔امدادی سامان کے یہ ٹرک ڈپٹی کمشنر عمران حامد شیخ نے الفتح سپورٹس کمپلیکس سے متاثرین سیلاب کے لئے اپنی نگرانی میں روانہ کئے۔ایڈیشنل ڈپٹی کمشنر جنرل قیصر عباس رند،اسسٹنٹ کمشنر سٹی صاحبزادہ محمد یوسف،انچارج ضلعی ایمرجنسی آپریشنل سنٹر محمد صادق،چیئرمین آل پاکستان پرائیوٹ سکولز الائنس صداقت حسین لودھی اوردیگر ڈونرز بھی موجود تھے۔ڈپٹی کمشنر نے مخیرکاروباری حضرات،شہریوں،پرائیویٹ سکولز الائنس ودیگر معاونین کا تہہ دل سے شکریہ اداکرتے ہوئے ان کے قومی،اخلاقی وسماجی جذبے کی تعریف کی اور کہا کہ فیصل آبادیوں نے ثابت کردیا کہ وہ سیلاب زدگان کی امداد کے لئے صف اول میں ہیں۔انہوں نے سوات بھجوائے جانے والے سامان کی کوالٹی چیک کی اور کہا کہ اس سے قبل مخیر حضرات کی طرف سے پنجاب اور سندھ کے سیلاب متاثرین کے لئے فوڈ ونان فوڈ آئیٹمز کے 45 ٹرک بھجوائے گئے اور اگلے مرحلہ میں ایوان صنعت وتجارت کے تعاون سے جعفر آبادبلوچستان کے سیلاب زدگان کے تباہ ہونیوالے گھروں کی تعمیر ومرمت کراکر دیں گے جبکہ فیصل آباد کے مخیر طبقات نے اپر دیر خیبر پختونخواہ کے علاقوں کوملانے والے تباہ حال برجز کی بحالی کیلئے بھی امداد فراہم کرنے کی حامی بھری ہے۔انہوں نے کہا کہ سیلاب متاثرین کی مکمل بحالی تک انہیں تنہا نہیں چھوڑیں گے۔
