تعلیم کا مقصد صاف ستھرے ماحول کے متعلق لوگوں میں شعور پیدا کرنا ہے۔ بلال فیروز

فیصل آباد ویسٹ مینجمنٹ کمپنی اور گورنمنٹ کالج یونیورسٹی کے اشتراک سے عصر حاضر میں سالڈ ویسٹ مینجمنٹ چیلنجز اور صفائی کے موضوع پر ایک روزہ سیمینار کا انعقاد کیا گیا۔ سیمینار کا مقصد شجرکاری اور صاف ستھرے ماحول کے متعلق معاشرے میں احساس ذمہ داری پیدا کرنا تھا۔تقریب کے مہمان خصوصی چیف ایگزیکٹو آفیسر فیصل آباد ویسٹ مینجمنٹ کمپنی بلال فیروز جوئیہ تھے۔سیمینار کے دیگر شرکاء میں رجسٹرار یونیورسٹی ڈاکٹر نعیم اقبال، نظامت امور طلباء کے ڈائریکٹر ڈاکٹر ندیم سہیل،گرین یوتھ مومنٹ کلب کے انچارج ڈاکٹر صابر حسین،پروٹوکول آفیسر رضوان احمد جوئیہ،سینئر منیجر آپریشنزایف ڈبلیو ایم سی اعجاز بندیشہ،ڈاکٹر شفاقت حسین کے علاوہ فیکلٹی ممبران اور طلباء و طالبات کی کثیر تعداد موجود تھی۔ اس موقع پر سی ای او فیصل آباد ویسٹ مینجمنٹ کمپنی نے اپنے خطاب میں کہا کہ صاف ستھرے ماحول اور استعمال شدہ اشیاء کو تلف کرنے کے بارے میں احساس ذمہ داری پیدا کرنے کے لئے ایسے موضوعات کا قومی نصاب میں شامل کرنا ضروری ہے۔انہوں نے مزید کہا کہ تعلیم کا مقصد معاشرے کی اصلاح اور صاف ستھرے ماحول کے متعلق لوگوں میں شعور پیدا کرنا ہے۔ان کا کہنا تھا کہ فیصل آباد ویسٹ مینجمنٹ کمپنی جی سی یونیورسٹی کے طلباء و طالبات کے ساتھ مل کر معاشرے میں بدلاؤ لانے اور صفائی کے متعلق آگاہی فراہم کرنے کے لئے عملی اقدامات اٹھانے جا رہی ہے۔رجسٹرار ڈاکٹر نعیم اقبال نے کہا کہ اپنے اردگرد کے ماحول کو صاف رکھنا ہم سب کی مشترکہ ذمہ داری ہے تاکہ اپنی آنے والی نسلوں کو صاف ستھرا اور پر امن پاکستان لوٹا سکیں۔ڈاکٹر ندیم سہیل نے اس موقع پر ڈائریکٹوریٹ آف سٹوڈنٹ افیئرز کے زیر انتظام کام کرنے والی مختلف سوسائٹیز اور ان کی کارکردگی رپورٹ پیش کی۔گرین یوتھ مومنٹ کلب کے انچارج ڈاکٹر صابر حسین نے کہا کہ دنیاوی تعلیم کے ساتھ ساتھ اخلاقی اور معاشرتی اقدار کے متعلق نئی نسل کو آگاہی فراہم کرنا اور معاشرے میں صاف ستھرے ماحول کے متعلق شعور اجاگر کرنا ضروری ہے۔ سینیئر منیجر آپریشنز ایف ڈبلیو ایم سی اعجاز بندیشہ نے سالڈ ویسٹ مینجمنٹ کے حوالے سے طلباء کو آگاہی فراہم کی۔سیمینار کے آخر میں شرکاء میں اعزازی اسناد اور تعارفی سر ٹیفکیٹ بھی تقسیم کئے گئے۔