مارکیٹوں کو رات 9 بجے بند کرنے کے سلسلے میں تاجر تنظیموں کا اجلاس

فیصل آباد(حمزہ اکرم)انرجی کی بچت کے حوالے سے مارکیٹوں کو ممکنہ طور پر رات 9 بجے بند کرنے کے سلسلے میں ضلع بھر کی تاجر تنظیموں کے سرکردہ عہدیداران سے اہم مشاورتی اجلاس کمشنر آفس میں منعقد ہوا جس کی صدارت ڈویژنل کمشنر زاہد حسین نے کی۔اجلاس میں ایڈیشنل کمشنر ریونیو طارق خاں نیازی اور اسسٹنٹ کمشنر سٹی صاحبزادہ محمد یوسف بھی موجود تھے۔اجلاس میں صدر چیمبر آف کامرس عاطف منیر شیخ،خواجہ شاہد رزاق سکا،اسلم بھلی،میاں آصف اسلم،راؤ ہاشم،عباس اشرف،مرزاشفیق،محمد ریاض شاہد،محمد افضل مغل،عامر حمید سینڈی،حاجی محمد عابد،عبدالرؤف،میاں عبدالوحید اور دیگر تاجر حضرات نے شرکت کی۔ڈویژنل کمشنر نے تاجروں کا خیر مقدم کرتے ہوئے پرائس کنٹرول میں ان کی گرانقدر معاونت کو سراہا اور کہا کہ انرجی کی بچت کے لئے بھی ان کا تعاون ناگزیر ہے اس ضمن میں مارکیٹیں رات کو 9 بجے بند کرنے کے ممکنہ حکومتی فیصلہ کے لئے مشاورت کی جارہی ہے۔انہوں نے کہا کہ حکومت کو مارکیٹوں وبازاروں کو شام کے اوقات میں لوڈشیڈنگ سے مستثنی کرنے کی بھی تجویز پیش کی گئی ہے۔انہوں نے تاجروں کے بعض تحفظات کو سنتے ہوئے ان کے قابل عمل حل اور اپنے ہر ممکن تعاون کی یقین دہانی بھی کرائی۔صدر چیمبر آف کامرس نے کہا کہ فیصل آباد کی بزنس کمیونٹی محب وطن اور ہر طرح کے بحران میں حکومت کے شانہ بشانہ کھڑی ہوتی ہے۔انہوں نے کہا کہ انرجی کی بچت کے لئے بھی حکومتی فیصلے پر ساتھ ہیں۔خواجہ شاہد رزاق سکا نے تعاون کی یقین دہانی کراتے ہوئے کہا کہ بجلی بحران سنگین مسئلہ ہے جس کے حل میں تعاون کیا جائے گا۔اسلم بھلی،میاں آصف اسلم،مرزا شفیق،عباس اشرف ودیگر نے بھی بجلی کی بچت کے لئے مارکیٹیں رات 9 بجے بند کرنے کے حکومتی ممکنہ فیصلہ میں اپنے تعاون کی یقین دہانی کرائی۔