ڈپٹی کمشنر کی ہدایت پر ساںحہ جڑانوالہ کے متاثرین کے گیس اور بجلی کے کنکشنز بحال کردیئے گئے

فیصل آباد(حمزہ اکرم)ڈپٹی کمشنر عبداللہ نیئر شیخ کی تحریک پرسانحہ جڑانوالہ کے بعد سینما چوک وملحقہ متاثرہ علاقوں میں سوئی نادرن گیس پائپ لائینز لمیٹڈاور فیسکو نے سوئی گیس اور بجلی کے کنکشنز بحال کرادیئے ہیں۔ڈپٹی کمشنر نے میڈیا نمائندگان کو تفصیلات سے آگاہ کرتے ہوئے بتایا کہ ٹیموں نے اب تک 27 سے زائد گھروں کو گیس کی سپلائی بحال کرادی۔محلہ چمڑا منڈی کرسچین کالونی میں 10گھروں کے جلے ہوئے میٹر تبدیل اور گیس چالو کرادی گئی۔محلہ عیسی نگری کھرڑیانوالہ روڑڈجڑانوالہ میں 14 مقامات پر گیس کے کنکشن بحال ہوچکے ہیں۔انہوں نے بتایا کہ چرچ سلیمی پارک لاہور روڈ پر میٹر تبدیل کرایا گیا اسی طرح ٹیلی فون ایکسچینج کے بالمقابل چرچ پر دو کنکشن بحال ہوچکے ہیں۔انہوں نے بتایا کہ بجلی کے پولز سے نئی تاریں ڈال کر گھروں کو بجلی کی سپلائی بحال اور ٹوٹے ہوئے بجلی کے میٹرز بھی تبدیل ہوگئے ہیں۔