فیصل آباد میں 13 فروری سے شروع ہونے والی انسداد پولیو مہم کا افتتاح کردیا گیا

فیصل آباد(محمد حمزہ)ضلع میں 13 فروری سے شروع ہونے والی انسداد پولیو مہم کا افتتاح کردیا گیا۔ڈویژنل کمشنر سلوت سعید اور ڈپٹی کمشنر علی عنان قمر نے ہلال احمر میٹرنٹی ہسپتال میں پانچ سال تک کی عمر کے بچوں کو حفاظتی قطرے پلاکر مہم کا باقاعدہ افتتاح کیا۔انسداد پولیو مہم 19 فروری تک جاری رہے گی جس کے دوران پانچ سال تک کی عمر کے 15 لاکھ 36ہزاربچوں کو پولیو سے بچاؤ کے حفاظتی قطرے پلائے جائیں گے جس کے لئے مجموعی طور پر 4869 پولیو ٹیمیں ڈیوٹی پر مامور ہونگی۔اس موقع پرسی ای او ڈسٹرکٹ ہیلتھ اتھارٹی ڈاکٹر کاشف محمود کمبوہ،ڈسٹرکٹ ہیلتھ آفیسر ڈاکٹر ثاقب منیر،سی ای او ایجوکیشن افتخارخان،ایم ڈی واسا جبارانور، میاں کمال الدین سمیت پختون نمائندوں اور دیگر افسران نے بھی بچوں کو قطرے پلائے۔ڈویژنل کمشنر نے کہا کہ وطن عزیز کو پولیو فری بنانا ترجیح ہے اور باربار مہم دہرانے کا مقصد اس وائرس کا یکسر خاتمہ کرنا ہے۔انہوں نے والدین سے اپیل کی کہ وہ اپنے پانچ سال تک کی عمر کے بچوں کو پولیو سے بچاؤ کے قطرے ضرور پلوائیں جبکہ مہمان بچوں کو بھی قطرے پلائیں اورگھر گھر آنے والی پولیو ٹیموں سے تعاون کریں۔ڈپٹی کمشنر نے ڈسٹرکٹ ہیلتھ اتھارٹی کے افسران سے کہا کہ مائیکروپلان پر ذمہ داری سے عمل کریں اور ضلع بھر میں پانچ سال تک کی عمر کا ایک بھی بچہ پولیو ویکسین کے بغیر نہیں رہنا چاہیے۔انہوں نے کہا کہ مہم کی دوہری مانیٹرنگ ہوگی اور غفلت پر ایکشن سے گریز نہیں کیا جائے گا۔سی ای او ہیلتھ اتھارٹی نے بتایا کہ انسداد پولیو مہم کے تمام تر درکار انتظامات ہر لحاظ سے مکمل ہیں۔