فیصل آباد (افضال تتلہ) چک جھمرہ کے حلقہ پی پی 97 میں گزشتہ روز ہونے والے ضمنی انتخابات میں غیر حتمی نتائج کے مطابق پاکستان تحریک انصاف کے ٹکٹ ہولڈرز علی افضل ساہی 67،022 ووٹ لے کر پہلے،مسلم لیگ کے ن پر الیکشن لڑنے والے اجمل چیمہ 54،266 ووٹوں کے ساتھ دوسرے جبکہ تحریک لبیک کے نوید شفیع 7،696 ووٹ لے کر تیسرے نمبر پر رہے۔ حلقہ پی پی 97 کے کل 255884 ووٹوں میں سے 133819 ووٹ ڈالے گئے ان میں مردوں کے کل ووٹ 138463 تھے جبکہ مرد حضرات 78779 ووٹ کاسٹ کرسکے اسی طرح خواتین کے کل ووٹ 117421 تھے مگر عورتیں 55040 ڈال سکیں۔ واضح رہے کہ ڈالے گئے کل 133819 ووٹوں میں سے 1482 ووٹوں کو گنتی سے خارج کردیا گیا تھا اس طرح ڈالے گئے ووٹوں کی شرح 52.3 فیصد رہی۔ اگر آزاد امیدواروں کی بات کی جائے تو ان میں 1651 ووٹ لے کر طارق محمود باجوہ پہلے نمبرپر رہے،جبکہ شیر افگن چیمہ 155 ووٹ، محمد عامر نواز 154ووٹ،وسیم اکرم 94ووٹ، رضوان لیاقت 51،فواد چیمہ 43،محمد آصف عزیز 10 ووٹ حاصل کر سکے جبکہ پاکستان نظریاتی پارٹی کے امیدوار محمد شعیب ادریس بھی الیکشن کی اس دوڑ 229 ووٹ لینے میں کامیاب ہوگئے اور جماعت اسلامی کے علی احمد گورایہ بھی 966 ووٹ لے اڑے۔
