اسسٹنٹ کمشنر تحصیل سمندری علیزہ ریحان سستے آٹے کے سیل پوائنٹس کا اچانک دورہ

فیصل آباد(حمزہ اکرم)اسسٹنٹ کمشنر تحصیل سمندری علیزہ ریحان سستے آٹے کی دستیابی وفروخت کو چیک کرنے کے لئے اچانک مختلف سیل پوائنٹس پر پہنچ گئیں۔ انہوں نے گوجرہ سمندری روڈ پر آٹے کی دستیابی وفروخت کا ریکارڈ چیک اور موقع پر موجود صارفین سے گفتگو کرکے آٹے کی فراہمی بارے دریافت کیا اور ڈیوٹی افسران کو حکم دیا کہ خریداروں کو تیز رفتاری سے آٹا فروخت کرایا جائے تاکہ رش پیدا نہ ہو۔اسسٹنٹ کمشنر نے بتایا کہ اس سیل پوائنٹ پر آج آٹا کے 3600 بیگز فروخت ہوئے۔انہوں نے پولیس کو سیل پوائنٹس پر ڈیوٹی پر مامور کرایا اور کہا کہ صارفین کو تیز رفتارسروسز کی فراہمی یقینی بنائی جارہی ہے۔انہوں نے واضح کیا کہ تحصیل میں آٹا کی کوئی قلت نہیں صارفین مقررکردہ ٹرکنگ/سیل پوائنٹس سے10کلوگرام آٹا کا تھیلا نوٹیفائیڈ ریٹ 648 روپے میں خریدیں۔ علاوہ ازیں نوٹیفائیڈ شاپس پربھی آٹے کے بیگز دستیاب ہیں۔انہوں نے کہا کہ سیل پوائنٹس کی چیکنگ اور صارفین کو آٹا کی بلارکاوٹ فروخت کے لئے تحصیل انتظامیہ سرگرم عمل رہے گی۔