زرعی یونیورسٹی میں 1906 سے قائم اولڈ کیمپس کو ملک کے پہلے زرعی عجائب گھر بنانے کا اعلان

فیصل آباد (نمائندہ ایف ٹی وی) زرعی یونیورسٹی فیصل آبادکے 1906میں تعمیر ہونے والے اولڈ کیمپس کو بینک آف پنجاب کے تعاون سے تاریخی ورثہ قرار دیتے ہوئے ملک کے پہلے زرعی عجائب گھر میں تبدیل کیا جائے گا۔اس بات کا فیصلہ وائس چانسلر چیمبر میں وائس چانسلر پروفیسر ڈاکٹر اقرار احمد خاں اور بینک آف پنجاب کے صدر ظفر مسعود کے مابین ملاقات میں کیا گیا۔ڈاکٹر اقرار احمد خاں نے کہا کہ پاکستان زرعی معیشت کا حامل ملک ہے جس کو زرعی یونیورسٹی فیصل آباد کے بطور برصغیر پاک و ہند کی اولین علوم زراعت کی دانشگاہ جو افرادی قوت اور تحقیقی مہارت کی صورت میں ورثہ منتقل کیا اسے محفوظ بنانے کیلئے لائحہ عمل کو حتمی شکل دے دی گئی ہے تاکہ زرعی ثقافتی پیش رفت کو درجہ بہ درجہ نئی نسل کیلئے محفوظ کیا جا سکے۔ڈاکٹر اقرار احمد خاں نے کہا کہ لائلپور کی تاریخ میں زرعی یونیورسٹی کے اولڈ کیمپس کو خاص اہمیت حاصل ہے جسے بر صغیر کے معروف ماہر تعمیرات بھائی رام سنگھ نے ڈیزائن کیا تھاجنہیں پنجاب یونیورسٹی لاہور،نیشنل کالج آف آرٹس،ایچی سن کالج لاہور اور اسلامیہ کالج پشاور کو بھی ڈیزائن کرنے کا اعزار حاصل ہے۔بینک کے صدر ظفر مسعود نے کہا کہ زندہ قومیں اپنی تاریخ کے سنہری ادوار کو عجائب گھر وں میں محفوظ کرتی چلی آرہی ہیں جامعہ زرعیہ کی اس کاوش میں بینک آف پنجاب تعاون کرنے کیلئے تیار ہے۔انہوں نے مزید کہا کہ تاریخی ورثے کے تناظر میں بینک کی ایک جدید ترین تعمیراتی حسن سے مزین برانچ یہاں قائم کی جائیگی۔