ڈپٹی کمشنر علی عنان قمر کی صدارت ڈسٹرکٹ ایمرجنسی رسپانس کمیٹی کا اجلاس

فیصل آباد(ڈسٹرکٹ رپورٹر)ڈسٹرکٹ ایمرجنسی رسپانس کمیٹی کا اجلاس ڈپٹی کمشنر علی عنان قمر کی صدارت میں منعقد ہوا جس میں ڈسٹرکٹ پروگرام کوآرڈینیٹر برائے انسداد وبائی امراض ڈاکٹر ذوالقرنین نے انسدادی اقدامات کی تفصیلات سے آگاہ کیا۔سی ای او ہیلتھ ڈاکٹر اسفندیار،ڈی ایچ او ڈاکٹر ثاقب منیرکے علاوہ تمام محکموں کے افسران بھی شریک تھے۔ڈپٹی کمشنر نے انسداد واحتیاطی اقدامات کا جائزہ لیتے ہوئے ضلعی محکموں کے سربراہان کو تاکید کی کہ وہ اپنے دفاتر کے ساتھ ساتھ گھروں میں بھی انسداد ڈینگی اقدامات کو یقینی بنائیں،کسی جگہ کھڑے پانی کو ختم کرانے کے ساتھ چھتوں کی مسلسل انسپکشن کی جائے۔انہوں نے کہا کہ وقفہ وقفہ سے بارشوں کے باعث ڈینگی لاروا کی افزائش کے خطرات موجود ہیں لہذا اینٹی ڈینگی ٹیمیں فیلڈ میں اپنی آنکھیں کھلی رکھیں اور ہاٹ سپاٹس کو بلاناغہ چیک کرکے لاروا ملنے پر مکینیکل وکیمیکل ٹرٹمنٹ کرائیں اس ضمن میں فرضی کارروائی پر حقیقی محکمانہ ایکشن ہوگا۔انہوں نے لاروا ملنے پر دکانداروں کے خلاف مقدمات کے اندراج اور تحصیل ایمرجنسی رسپانس کمیٹیز کی میٹنگ باقاعدگی سے کرنے کی تاکید کی۔انہوں نے عوامی آگاہی کے لئے تمام تر تشہیری ذرائع بھی بروئے کار لانے اور ان ڈور سرویلنس کو ذمہ داری سے انجام دینے کا حکم دیا۔