چک جھمرہ میں ڈی پی ایس سکول کا قیام تیزی سے جاری

فیصل آباد(نمائندہ ایف ٹی وی )تحصیل چک جھمرہ میں 100 کنال سرکاری اراضی پر ڈویژنل پبلک سکول کا قیام عمل میں لانے کے لئے متعلقہ امور کو تیز رفتاری سے آگے بڑھایا جارہا ہے۔اس ضمن میں ڈویژنل کمشنر ثاقب منان کی زیر صدارت ایک اہم اجلاس منعقد ہوا جس میں ڈائریکٹر ڈویلپمنٹ ڈاکٹر نوید افتخار اولکھ،ایڈیشنل کمشنر ایوب خاں،پرنسپل ڈی پی ایس مین کیمپس محمد شاہدکے علاوہ رہنما پاکستان تحریک انصاف شیر افگن چیمہ بھی موجود تھے۔اجلاس کو بتایا گیا کہ ڈویژنل پبلک سکول کے قیام کے سلسلے میں 23 کروڑ روپے کے فنڈز کا تخمینہ ہے جن کا ڈی پی ایس اور ڈونزر کے اشتراک سے بندوبست کیا جاہا ہے جبکہ سرکاری اراضی کے انتقال سمیت دیگر محکمانہ امور بھی مکمل کئے جارہے ہیں۔ڈویژنل کمشنر نے کہاکہ بچوں کو کم خرچ میں معیاری تعلیم وتربیت کی فراہمی کے لئے ڈی پی ایس سکولز ایک بڑا پراجیکٹ ہے اسی مقصد کیلئے پبلک سکولز کا دائرہ ڈویژن بھر میں پھیلایاجارہا ہے۔انہوں نے چک جھمرہ میں ڈی پی ایس سکول کے قیام کے سلسلے میں حائل رکاوٹوں کو فی الفور دور کرکے تعمیرات شروع کرنے کی تاکید کی۔انہوں نے کہا کہ ڈویژنل انتظامیہ اس ضمن میں تمام تر انتظامی وتکنیکی معاونت فراہم کرے گی۔