فیصل آباد (نمائندہ ایف ٹی وی) صوبائی وزیر خزانہ پنجاب مخدوم ہاشم جواں بخت نے کہا ہے کہ صوبے کی ترقی کی راہ میں حائل تمام روکاوٹوں کو آئندہ صوبائی بجٹ میں حل کر دیا جائے گاتاکہ معاشی ترقی کی رفتار کو مزید تیز کیا جا سکے۔ یہ بات وزیر خزانہ نے پنجاب کے پری بجٹ سیشن کے سلسلہ میں پنجاب بورڈ آف انوسٹمنٹ اینڈ ٹریڈ کے ایک اجلاس کے دوران تاجروں اور صنعتکاروں کے ایک اجلاس سے خطاب کرتے ہوئے کہی جس میں صوبائی وزیر صنعت و تجارت میاں اسلم اقبال، چیئرمین پی بی آئی ٹی سردار الیاس تنویر اورفیصل آباد چیمبر آف کامرس اینڈانڈسٹری کے صدر انجینئر حافظ احتشام جاویدنے شرکت کی۔ انہوں نے دو ٹوک الفاظ میں اعلان کیا کہ حکومت نے دوہرے ٹیکسوں کو ختم کرنے کا حتمی فیصلہ کر لیا ہے۔ جو شخص ایف بی آر کے پاس رجسٹرڈ ہوگا اسے پی آراے کی رجسٹریشن لینے کی ضرورت نہیں ہو گی۔ اس طرح جو شخص پہلے ہی پی آر اے کے پاس رجسٹر اُسے ایف بی آر رجسٹریشن کیلئے تنگ نہیں کرے گی۔ چیئرمین پنجاب بورڈ آف انوسٹمنٹ اینڈ ٹریڈ سردار الیاس تنویر نے روڈانفراسٹرکچر ڈویلپمنٹ سیس کو بھی ختم کرنے کا اعلان کیا اور کہا کہ ون ونڈو آپریشن کو حقیقی معنوں میں اس کی اصل روح کے مطابق نافذ کیا جائے گا تاکہ نئے سرمایہ کاروں کو زیادہ سے زیادہ سہولتیں مہیا کی جا سکیں۔ انہوں نے کہا کہ پنجاب حکومت وفاقی حکومت کے ساتھ رابطے ہیں ہے اور اس کی مشاورت سے آئندہ بجٹ میں ہر قسم کے خام مال پر ڈیوٹیاں ختم کر دی جائیں گی۔ انہوں نے کہا کہ پیکجز انڈسٹری کیلئے اس بجٹ میں خصوصی مراعات کا اعلان کیا جائے۔صوبائی وزیر میاں اسلم اقبال نے انجینئر حافظ احتشام جاوید کو بتایا کہ ایس ایم ای سیکٹر کو وومن ایس ایم ای سیکٹر سے الگ کیا جا رہا ہے جس سے تھوڑے سرمایہ سے کاروبار کرنے والی خواتین کیلئے ہر ممکن مراعات مہیا کی جا سکیں گی۔ انہوں نے دیگر بہت سے مسائل کا بھی حوالہ دیا اور کہا کہ اُن پر مشاورت کیلئے بہت جلد ایک اور الگ میٹنگ ہو گی تاکہ بجٹ میں تاجروں اور صنعتکاروں کو زیادہ سے زیادہ مراعات دی جا سکیں۔
