کینال ایکسپریس وے پر سٹیٹ آف دی آرٹ GOR-3 کے منصوبے کا افتتاح

فیصل آباد(حمزہ اکرم)ضلعی انتظامیہ کی طرف سے کینال ایکسپریس وے پر واپڈا سٹی کے قریب سٹیٹ آف دی آرٹ جی او آر تھری کے منصوبے کا سنگ بنیاد رکھ دیا گیا۔ڈپٹی کمشنر علی شہزاد نے افتتاحی تختی کی نقاب کشائی کی۔340 کنال اراضی پر قائم ہونے والا یہ منصوبہ 44 کروڑ روپے کی لاگت سے دو سال میں مکمل ہوگا جہاں گریڈ 18،17،گریڈ 15،11سے 14 اور ایک سے 5 سکیل کے افسران وملازمین کے لئے 40 سے زائد گھر تعمیر کئے جائیں گے۔ڈپٹی کمشنر نے میڈیا سے گفتگو کرتے ہوئے کہا کہ جی او آر تھری میں پارک،سکول،کمرشل مارکیٹ ودیگر سہولیات ایک چھت تلے میسرہونگی۔انہوں نے بتایا کہ جی او آر ون اور ٹو میں گنجائش نہ ہونے پر جی او آر تھری منصوبہ شروع کیا جارہا ہے جس میں افسران وملازمین کو سہولت ملے گی۔انہوں نے بتایا کہ فی الحال 270 کنال پر فوری تعمیراتی کام شروع کیا جارہا ہے اور اس مالی سال میں دو کروڑروپے خرچ ہونگے۔انہوں نے ٹھیکیدار کو معیاری تعمیر اور دستیاب فنڈز کو تیز رفتاری سے شفاف انداز میں بروئے کار لانے کی ہدایت بھی کی۔ایڈیشنل ڈپٹی کمشنرریونیو/فنانس عابد حسین،اسسٹنٹ کمشنرز عمر مقبول،صاحبزادہ محمد یوسف،خاوربشیر،ڈپٹی ڈائریکٹر ڈویلپمنٹ رانا طاہر ودیگر افسران موجود تھے۔