فیصل آباد(نمائندہ ایف ٹی وی)چیف ایگزیکٹو فیسکو انجنئیر بشیراحمد کی خصوصی ہدایات پر لائن سٹاف کی زندگیوں کی حفاظت کیلئے ریجن بھر میں سیفٹی سیمینارز کے انعقاد کا سلسلہ جاری و ساری ہے۔اس سلسلے میں جھنگ سرکل میں سیفٹی سیمینار کا انعقاد کیاگیا۔ جس سے خطاب کرتے ہوئے ایڈیشنل چیف انجنئیر جھنگ سرکل نذرمحمد ڈب نے کہا ہے کہ لائن سٹاف کی قیمتی جانوں کا تحفظ اور ان کو حادثات سے بچانا اولین ترجیح ہے اور اس سلسلے میں کسی قسم کی کوتاہی ہرگز برداشت نہیں کی جائے گی۔ہم نے ہمیشہ بھرپور کوشش کی ہے اور کرتے رہیں گے کہ ہماری اولین ترجیح ہمارے ورکرز کی سیفٹی ہواور اس سلسلے میں ہم نے سٹاف کی مسلسل تربیت کا بھی انتظام کیا اوران کے آلات کی بہتری کی مسلسل کوششیں بھی کیں۔ فیسکو ریجن میں لائن سٹاف کوحادثات سے بچاؤکیلئے پہلے بھی مختلف تربیتی کورسزکروائے جارہے ہیں لیکن افسوس کی بات ہے کہ فیلڈ سٹاف سیفٹی کے اقدامات میں کوتاہی کر دیتے ہیں جس کا نتیجہ جان لیواثابت ہوتا ہے۔ انہوں نے ایکسئین حضرات کو ہدایت کی ہے کہ وہ فیلڈ کے اندر ہونے والے اس نوعیت کے تمام معاملات پر گہری اور براہ راست نگرانی رکھیں اور تمام انتظامی افسران کو بھی اس بات کا پابند کریں کہ وہ لائنوں پر کام کے دوران تما م تر حفاظتی اقدامات، ٹی اینڈ پی کے استعمال سمیت سیفٹی کے تمام تر اصولوں پر عملدرآمد کو یقینی بنائیں کیونکہ یہ ان سب کی ایڈمنسٹریشن کا کلیدی حصہ ہے اور اس ذمہ داری پر کسی قسم کا کوئی سمجھوتہ نہیں ہوگا۔اس موقع پر ایکسئین فرسٹ جھنگ سلیم شاہ، ایکسئین جھنگ سیکنڈ مدثر علی، ٹیکنیکل آفیسرجھنگ سرکل لیاقت اعوان نے بھی خطاب کیااورلائن سٹاف کو دوران ڈیوٹی ٹی اینڈ پی کے استعمال کے بارے میں معلومات فراہم کیں اور دوران ڈیوٹی سیفٹی کوڈ پر سختی سے عملد رآمد کو یقینی بنانے پرزور دیا۔سیفٹی سیمینارمیں جھنگ سرکل کے ایکسئینز، ایس ڈی او ز، لائن سپرنٹنڈنٹس، لائن مینوں اور اسسٹنٹ لائن مینوں کی کثیرتعداد نے شرکت کی۔
