مولانا طارق جمیل کا ٹریفک وارڈنز سے خصوصی خطاب، حسنِ اخلاق اور خدمتِ خلق کی تلقین

معروف مذہبی اسکالر حضرت مولانا محمد طارق جمیل نے ٹی ایم اے ہال اسٹیشن چوک میں ٹریفک وارڈنز سے خصوصی خطاب کرتے ہوئے کہا کہ اللہ تعالیٰ نے انسان کو انسانیت کی خدمت اور بھلائی کے لیے پیدا کیا ہے، اس لیے ٹریفک پولیس اہلکار سڑکوں پر اپنے فرائض کی ادائیگی کو محض ملازمت نہیں بلکہ خدمتِ خلق اور صدقۂ جاریہ سمجھ کر انجام دیں۔ انہوں نے دینی تعلیمات کی روشنی میں ٹریفک اسٹاف کو حسنِ اخلاق، صبر، تحمل، نرمی اور عوام کے ساتھ شفقت و احترام سے پیش آنے کی تلقین کی اور کہا کہ کسی شہری کی رہنمائی کرنا، اسے مشکلات سے نکالنا، اس کی جان و مال کے تحفظ میں کردار ادا کرنا بھی نیکی اور اجر کا ذریعہ ہے۔ مولانا طارق جمیل نے کہا کہ ٹریفک وارڈنز اپنے رویے اور کردار سے عوام کے دل جیتیں اور ہر شہری کے ساتھ آسانی، سہولت اور خیرخواہی کا معاملہ کریں۔ اس موقع پر چیف ٹریفک آفیسر فیصل آباد ناصر جاوید رانا بھی موجود تھے جبکہ ٹریفک پولیس کے افسران و اہلکاروں کی کثیر تعداد نے اس مثبت اور اصلاحی نشست میں شرکت کی اور مولانا طارق جمیل کی دینی و اخلاقی گفتگو کو نہایت توجہ اور دلچسپی سے سنا۔