گراں فروشوں کونکیل ڈالی جاے ۔ ڈپٹی کمشنر محمد علی

فیصل آباد(نمائندہ ایف ٹی وی)ڈپٹی کمشنر محمد علی نے ضلع بھر کے پرائس کنٹرول مجسٹریٹس کو روزانہ کم ازکم50 انسپکشنز کرنے اور اشیائے ضروریہ کے گرانفروشوں کیخلاف مقدمات کے اندراج کا حکم دیا ہے۔انہوں نے پرائس کنٹرول مجسٹریٹس کے اجلاس کی صدارت کرتے ہوئے روزانہ کی بنیاد پر کی جانیوالی انسپکشنز کو قیمت پنجاب ایپ پر اپ لوڈ کرنے کی بھی ہدایت کی اور کہا کہ آٹا،چینی،دالیں،پھل وسبزیوں اوردیگر اشیائے خورونوش کی مقررکردہ قیمت پر سو فیصد عملدرآمد کرایا جائے۔انہوں نے کہا کہ اشیائے ضروریہ کے گرانفروشوں کونکیل ڈالنے اور ریٹ لسٹ کے مطابق اشیا فروخت نہ کرنیوالے دکانداروں کیخلاف بلا امتیاز کارروائی کریں تاکہ صارفین کو لوٹنے والوں کا قبلہ درست ہو۔انہوں نے ہدایت کی کہ ذخیرہ اندوزوں کا سراغ لگا کر مصنوعی مہنگائی کرنیوالوں کو قانون کی گرفت میں لائیں۔ڈپٹی کمشنر نے بعض پرائس کنٹرول مجسٹریٹس کی ناقص کارکردگی پر انہیں شوکاز نوٹس جاری کیا اور کہا کہ پرائس کنٹرول مجسٹریٹس کی روزانہ کارکردگی مانیٹر ہوگی اور پراگریس نہ دکھانے والے جوابدہ ہونگے۔