ڈپٹی کمشنر علی شہزاد کا تحصیل جڑانوالہ کا دورہ

فیصل آباد(حمزہ اکرم)ڈپٹی کمشنر علی شہزاد نے تحصیل جڑانوالہ کا بھرپور دورہ کیا۔انہوں نے مکوآنہ میں رک کر پولیو ٹیموں کی موجودگی اور انسداد پولیو کی خصوصی مہم پر عملدرآمد کو چیک کیااور ہیلتھ اتھارٹی کوپولیس کے تعاون سے مسافر بسوں میں بچوں کی سکریننگ کا حکم بھی دیا اور کہا کہ والدین کے ہمراہ سفر کرنیوالا پانچ سال تک کی عمر کا کوئی بچہ پولیو کے قطرے پینے سے محروم نہیں رہنا چاہیے۔ڈپٹی کمشنر نے سڑک کی صورت حال کا بھی جائزہ لیااور اسکی شفاف تعمیر پر زوردیا۔سی ای او ہیلتھ ڈاکٹر بلال احمد اور ڈپٹی ڈائریکٹر ڈویلپمنٹ رانا طاہر بھی ہمراہ تھے۔ڈپٹی کمشنر نے چک 105 میں حویلی بھگت سنگھ کا دورہ کیااورحویلی کے مختلف حصے دیکھتے ہوئے حویلی مالک کی طرف سے حویلی کی تاریخی حیثیت بحال رکھنے کے اقدام کو سراہا اور کہا کہ ضلعی انتظامیہ تاریخی عمارات کے تحفظ وبحالی کے لئے اقدامات کررہی ہے۔انہوں نے مہمان خانے کیلئے دو کمروں اور واش رومز کی تعمیر کا تخمینہ لاگت بنانے کی بھی تاکید کی۔انہوں نے جڑانوالہ میں نہر کے ساتھ پارک اورلاہور موڑ کی بحالی کا حکم دیا جبکہ سٹریٹ لائٹس کو فعال کرنے اورعلاقائی خوبصورتی کے لئے اقدامات جاری رکھنے کی تاکید کی۔ڈپٹی کمشنر نے سہولت بازار کا بھی دورہ کیااورصارفین کو کنٹرول قیمت پر اشیائے ضروریہ کی دستیابی ومعیار کا جائزہ لیا۔انہوں نے تحصیل ہیڈ کوارٹرہسپتال کے منظور شدہ فنڈز کی فراہمی یقینی بنانے کیلئے اقدامات کا حکم دیتے ہوئے ہسپتال میں انتظامی وطبی امور چیک کئے۔انہوں نے مریضوں کو فراہم کی جانے والی سہولتوں اور ڈائیلاسز یونٹ،پولیو کاؤنٹر، کورونا ویکسین سنٹر بھی چیک کئے۔اسسٹنٹ کمشنراحمد سعید منج،ایم ایس عبدالماجد بھی موجود تھے۔ڈپٹی کمشنر نے ٹی ایچ کیو کی توسیع کیلئے مجوزہ جگہ کا بھی دورہ کیا۔انہوں نے جڑانوالہ میں پہلے فیمیل مرکز مال کا دورہ بھی کیا۔