فیصل آباد(حمزہ اکرم)پنجاب ٹیلنٹ ہنٹ پروگرام کے تحت نوجوانوں کے مابین ضلع کی سطح کے مقابلے شروع ہوگئے۔دو روزہ مقابلوں کا افتتاح ایڈیشنل ڈپٹی کمشنر جنرل قیصر عباس رند نے کیا۔ڈائریکٹر آرٹس کونسل زاہد اقبال،سی ای او ایجوکیشن علی احمد سیان،فوکل پرسن محمد صادق،پرنسپلز،اساتذہ اور طلباء وطالبات بھی بڑی تعداد میں موجود تھے۔پنجاب کونسل آف دی آرٹس فیصل آباد ڈویژن کا پنجاب ٹیلنٹ ہنٹ پروگرام کے ڈسٹرکٹ سطح کے چوتھے پروگرام میں گائیگی، مصوری،ادب اور دستکاری میں طلباء وطالبات نے اپنی مہارت کے جوہر دکھائے۔3 فروری کو تھیٹر اور لوک رقص کے مقابلے ہونگے جبکہ ڈویژن کی سطح کے مقابلہ جات 8۔ اور 9 فروری کو نصرت فتح علی خان آڈیٹوریم میں ہوں گے۔ایڈیشنل ڈپٹی کمشنر جنرل نے مقابلوں میں شریک طالب علموں کے فن کا جائزہ لیااور کہا کہ وزیر اعلی پنجاب سردار عثمان بزدار کے ویژن کے مطابق فن و ثقافت کے فروغ کے لیے نوجوان نسل کو اپنی تخلیقی صلاحیتوں کو آزمانے اور ضلعی و ڈویژن کی سطح پہ ہزاروں جبکہ بعد ازاں صوبائی مقابلوں میں لاکھوں روپے کے انعامات تقسیم کئے جائیں گے۔انہوں نے کہا کہ پنجاب ٹیلنٹ ہنٹ پروگرام 2022 فن وثقافت کے فروغ کے لیے حکومت کا ایک بہترین اقدام ہے اس طرح کی صحت مندانہ سرگرمیاں نوجوان نسل کے لیے بہت ضروی ہیں۔ ڈائریکٹر آرٹس کونسل نے کہا کہ پنجاب ٹیلنٹ ہنٹ پروگرام سے ہماری نوجوان نسل میں موجود قدرتی ٹیلنٹ کو اجاگر کر کے اس کو قومی اور بین الاقوامی سطح پر آگے لے جایا جا رہاہے۔انہوں نے بتایا کہ نوجوانوں میں اس طرح کے مقابلوں کا انعقاد خوش آئند بات ہے۔ڈائریکٹر پنجاب آرٹس کونسل نے کہا کہ پنجاب ٹیلنٹ اپنی نوعیت کا ایک منفرد پروگرام ہے جو پنجاب کا بالخصوص اور پاکستان کا سوفٹ امیج دنیا کے سامنے لے کر آرہا ہے۔ انہوں نے کہا کہ ٹیلنٹ ہنٹ پروگرام کا مقصد نوجوانوں کی حوصلہ افزائی ہے کیونکہ پاکستان کا مستقبل انہی نوجوانوں سے جڑا ہے۔مقابلوں میں شریک نوجوانوں نے پنجاب ٹیلنٹ ہنٹ پروگرام کے انعقاد پر حکومت پنجاب کا شکریہ ادا کیا۔
