فیصل آباد میں 2 ہفتوں کے دوران 18 ہزار ٹن کوڑا کرکٹ شہر سے باہر منتقل کیا گیا۔ بلال فیروز

فیصل آباد(حمزہ اکرم) پنجاب حکومت کی ہدایات پر فیصل آباد ویسٹ مینجمنٹ کمپنی شہر میں بہترین صفائی کا معیار قائم رکھنے کیلئے پر عزم ہے۔صاف پنجاب مہم کے سلسلہ میں شہر کی صفائی ستھرائی اولین ترجیح ہے۔چیف ایگزیکٹیو آفیسر فیصل آباد ویسٹ مینجمنٹ کمپنی بلال فیروز جوئیہ نے کہا ہے کہ فیصل آباد ویسٹ مینجمنٹ کمپنی کے زیر انتظام خصوصی صفائی مہم کے پہلے دو ہفتوں کے دوران 18ہزار813 ٹن کوڑ اکرکٹ شہر سے باہر منتقل کیا گیا جبکہ کارکردگی ایپ پرصفائی ستھرائی کی 31ہزار472 سرگرمیوں کو اپ لوڈ کیا گیا۔شہر بھر میں جاری مجموعی صفائی آپریشنز کے دوران ابتدائی15 یوم میں 17یونین کونسلوں میں زیرو ویسٹ آپریشنز کامیابی سے مکمل کرائے گئے اور پسماندہ یونین کونسلوں میں کوڑ اکرکٹ سے بھرے 225 پلاٹوں کو بھی کلیئر کرایا گیا۔اسی طرح 432سینٹرل میڈینز کی سکریپنگ کر کے ڈیوائیڈر ز کی مکینیکل واشنگ کا عمل مکمل کیا گیا۔مساجد،امام بارگاہوں،مزارات اور قبرستانوں کی بھی صفائی کرائی گئی۔سی ای او نے مزید کہا کہ صفائی آپریشنز کے ساتھ ساتھ سماجی آگاہی کی سرگرمیوں کا انعقاد بھی کرایا جا رہا ہے تا کہ عوام الناس بالخصوص طلباء میں صفائی ستھرائی کا شعور بیدار کیا جا سکے۔ اس ضمن میں صاف پنجاب مہم کے آغاز سے اب تک مختلف نوعیت کے 20پروگرام منعقد کئے گئے۔اسی طرح عوامی شکایات کے ازالہ کیلئے ایف ڈبلیو ایم سی کی ہیلپ لائن 1139 مکمل فعال ہے۔شہریوں کی طرف سے درج کرائی گئی 154 شکایات کا 100فیصد حل ممکن بنایا گیا۔