غیر قانونی ہاؤسنگ سکیموں کیخلاف ایف ڈی اے کی بڑی کارروائی

فیصل آباد(حمزہ اکرم)جنرل ایف ڈی اے ڈاکٹر فیصل عظیم کی ہدایات پر غیر قانونی ہاؤسنگ سکیموں اور قبضہ مافیا کے خلاف بھرپور آپریشن جاری ہے اس ضمن میں ایف ڈی اے کی انفورسمنٹ ٹیم نے کارروائی کرتے ہوئے ایک غیر منظور شدہ ہاؤسنگ سکیم کے دفتر کو سربمہر اور قبضہ مافیا سے سرکاری پلاٹ واگزار کروا لیا۔ تفصیلات کے مطابق اسٹیٹ آفیسر امتیاز علی گورایہ کی سربراہی میں ایف ڈی اے کی انفورسمنٹ ٹیم نے مختلف علاقوں میں قائم کی جانیوالی پرائیویٹ ہاؤسنگ سکیموں کی قانونی حیثیت کوچیک کیا تو چک نمبر 100ج۔ ب میں ہاؤسنگ سکیم ریاض گارڈن کو غیر قانونی پایا جس کے دفتر کو فوری طور پر سربمہر کردیاگیا علاوہ ازیں علامہ اقبال کالونی میں سرکاری پلاٹ پر کاروباری سامان رکھ کر ناجائز قبضہ کرنیوالوں کے کارروائی کرتے ہوئے مختلف نوعیت کا سامان اٹھا لیا گیا اور دیگر پختہ تجاوزات کو مسمار کرکے ناجائز قبضہ سے پلاٹ خالی کرالیاگیا۔ ایف ڈی اے انتظامیہ کی طر ف سے خبردار کیاگیا ہے کہ تجاوزات اور سرکاری جگہ پر قبضہ جمانے سے گریز کیاجائے بصورت دیگر قصورداروں کے خلاف مقدمات بھی درج کرائے جائینگے۔