ضلعی انتظامیہ کے اشتراک سے انسداد ڈینگی سے آگاہی پر تربیتی سیشن

فیصل آباد(نمائندہ ایف ٹی وی) انتظامیہ اور ڈسٹرکٹ ہیلتھ اتھارٹی کے اشتراک سے انسداد ڈینگی سے آگاہی اورلاروا کی تلفی کے لئے سرویلنس کے حوالے سے میٹروپولیٹن کارپوریشن ہال میں تربیتی سیشن منعقد ہوا۔ڈپٹی کمشنر لیفٹیننٹ(ر)سہیل اشرف نے خصوصی شرکت کی۔سیمینار میں ماہر حشرات زرعی یونیورسٹی ڈاکٹر وسیم اکرم کی ڈینگی سرویلنس کے حوالے سے تمام ضلعی انچارجز کو آگاہی۔انہوں نے کہا کہ باریک بینی سے ذمہ دار سرویلنس کرکے مطلوبہ نتائج حاصل کئے جاسکتے ہیں۔انہوں نے ہاٹ سپاٹس کی کڑی نگرانی اور کھڑے پانی کو خشک کرنے کے لئے اقدامات کرنے پر بھی زوردیا۔آگاہی سیشن سے سی ای او ہیلتھ ڈاکٹر سلیمان زاہد نے ان ڈور اور آؤٹ ڈور سرویلنس سرگرمیوں پر بریفنگ دی۔اسسٹنٹ کمشنرز صاحبزادہ محمد یوسف،فیصل سلطان،نعمان علی،احمد سعید منج اور خاور بشیرکے علاوہ ڈی جی پی ایچ اے ایوب خاں،سی او میٹروپولیٹن کارپوریشن زبیر حسین،انچارج ڈسٹرکٹ ایمرجنسی آپریشنل سنٹر محمد صادق، ماہر تعلیم محمد اختر بٹ اور تمام ضلعی محکموں کے سربراہان موجودتھے۔ڈپٹی کمشنر نے کہاکہ ہاٹ سپاٹس کی ذمہ دارانہ چیکنگ کرکے ڈینگی لاروا کا انسداد یقینی بنایا جاسکتا ہے۔انہوں نے محکموں کے ہیڈز سے کہا کہ فرضی کارروائیوں سے گریز کریں اور فیلٍڈ میں موجود رہ کر لاروا کی افزائش کے مقامات کا صفایا کیا جائے۔ انہوں نے کہا کہ مون سون موسم سر پر ہے اینٹی ڈینگی ٹیموں کی سرگرمیوں سے نتائج ملنے چاہیں۔ڈپٹی کمشنر نے کہا کہ ضلع کے تمام متعلقہ محکمے ٹیم ورک کے طور پر کام کریں اور خصوصی طور پر تمام دفاتر میں صفائی کا اعلی معیار قائم کریں،چھتیں کلیئر،کاٹھ کباڑ تلف اور کسی جگہ پانی جمع نہیں ہونا چاہیے۔ہاؤس کیپنگ نہ ہوئی تو متعلقہ محکمے کے ہیڈ کے خلاف بھی ایکشن ہوگا۔انہوں نے کھڑے پانی کے تالابوں میں لاروا کھانے والی تلاپیہ مچھلیاں چھوڑنے کی تاکید کی اور کہا کہ شہریوں کی آگاہی کے لئے تمام تر تشہیری ذرائع بروئے کار لائے جائیں۔ڈپٹی کمشنر نے عزم کا اظہار کیا کہ مشترکہ کاوشوں سے موجودہ اور آئندہ سیزن میں بھی ڈینگی کو شکست دیں گے۔