نبیﷺ نے درخت لگانے کا حکم دیا ہے. سی ای او فیسکو

فیصل آباد(نمائندہ ایف ٹی وی) چیف ایگزیکٹو فیسکو انجنئیر بشیراحمد نے کہا کہ اسلام میں جہاں صفائی کو نصف ایمان کہا گیا ہے وہیں ہمارے پیارے نبی ﷺ نے درخت لگانے کابھی حکم دیا ہے اوربغیر بہت ضروری وجوہات کے درخت کاٹنے سے بھی منع فرمایا ہے۔ آپ رسول اکرمﷺ نے فرمایا کہ درخت لگانا صدقہ جاریہ ہے اورشجر باعث اجر ہے وہ فیسکوریجن میں شجرکاری مہم کے افتتاح کے موقع پر خطاب کر رہے تھے۔ انھوں نے کہا کہ شجرکاری ماحول کو خوبصورت، دلکش اور حسین بناتی ہے۔ درخت ہمارے ماحول کو سنوارنے میں اہم کردار ادا کرتے ہیں درختوں اورپودوں کی ہی بدولت ہم صاف ہوا، غذا، لکڑی، ایندھن، پھل،سبزیاں اور میوہ جات حاصل کرتے ہیں۔ انھوں نے مزید کہا کہ درخت انسان کے بے حد قیمتی سرمایہ ہیں کیونکہ درخت ہمیں آکسیجن مہیا کر تے ہیں اورہم باآسانی سانس لے سکتے ہیں اورگرمیوں میں موسم کی حدت کو کم کرنے میں مددگار ہوتے ہیں۔ انھوں نے کہا کہ درخت آلودگی کو ختم کرنے میں مدد کرتے ہیں اسی طرح جنگلات آندھیوں اورپانی کے کٹاؤ سے بچاتے ہیں۔قدرتی ماحول کو صاف رکھنے کیلئے کم از کم 25فیصدرقبہ پر درخت ہونا ضروری ہیں لیکن ہمارے ملک میں جنگلات کی کٹائی اور نا مناسب منصوبہ بندی کی وجہ سے درخت کم ہوتے جارہے ہیں۔ انہوں نے کہا کہ انتہائی افسوس کی بات ہے کہ ہمارے ملک میں شجرکاری کی اہمیت پر زور نہیں دیا جاتا۔انھوں نے فیسکو کے تمام دفاتراور گرڈ سٹیشنز میں زیادہ سے زیادہ پودے لگانے کا حکم دیا اور کہا کہ ان کی ہر ممکن طریقے سے دیکھ بھال کی جائے تاکہ یہ پودے بڑے درخت بن سکیں اور ماحول کی آلودگی میں کمی کا باعث بنیں بعدازاں انھوں نے جنرل مینجر کسٹمر سروسز عترت حسین اور ڈی جی ایڈمن اطہر ایوب نے فیسکوآفیسرزکلب کے لان میں پودا لگا کر شجرکاری مہم کا آغازکیا۔ اس موقع پر چیف فنانشل آفیسر نذیراحمد،، ڈائریکٹر پی آر طاہر شیخ، سٹاف آفیسر عابدرشید، ڈائریکٹر او ڈی محمود احمداور اسسٹنٹ ڈائریکٹر محمد فاروق بھی موجود تھے۔