ایف ڈی اے کا غیر قانونی ہاؤسنگ سکیموں کیخلاف آپریشن غیر قانونی تعمیراتی ڈھانچوں کو مسمار کردیا

فیصل آباد(محمد حمزہ)ڈائریکٹرایف ڈی اے کی ہدایت پر غیر قانونی ہاؤسنگ سکیموں کے خلاف آپریشن کے دوران ایف ڈی اے کی انفورسمنٹ ٹیم نے غیر منظور شدہ اضافی آبادیوں اور ایک ہاؤسنگ سکیم کے غیر قانونی تعمیراتی ڈھانچوں کو مسمار اور دفاتر کو سربمہر کردیا۔ تفصیلات کے مطابق اسٹیٹ آفیسر امتیاز علی گورایہ کی سربراہی میں ایف ڈی اے کی انفورسمنٹ ٹیم نے مختلف علاقوں میں ہاؤسنگ سکیموں کی جانچ پڑتال کی تو چک نمبر 246رب،247رب،250رب اور 251رب میں چار اضافی آبادیوں اور چک نمبر251رب میں بسم اللہ گارڈن کو خلاف قانون پایاتو ان کے غیر قانونی تعمیراتی ڈھانچوں کو مسمار اور دفاتر کو سیل کردیاگیا۔ڈویلپرز کو تنبیہ کی گئی ہے کہ وہ قانو ن شکنی سے اجتناب کریں اور قانونی و محکمانہ تقاضے پورے کئے بغیرہاؤسنگ سکیموں کو مشتہر اور ترقیاتی کاموں کے اجراء سے باز رہیں بصورت دیگر نقصان کے وہ خود ذمہ دار ہونگے اور مزید خلاف ورزیوں کی صورت میں قصور وار افراد کے خلاف فوجداری مقدمات بھی درج کرائے جاسکتے ہیں۔ایف ڈی اے انتظامیہ کی طر ف سے عوام الناس کو آگاہ کیاگیاہے کہ وہ غیر قانونی ہاؤسنگ سکیموں سے ہوشیار رہیں اور کسی بھی ہاؤسنگ سکیم میں پلاٹ خرید نے سے قبل اس کی قانونی حیثیت و ریکارڈ کی جانچ پڑتال ضرورکرلیں تاکہ بعد ازاں انہیں کسی قسم کی پریشانی کاسامنا نہ کرناپڑے۔