فیصل آباد(ڈسٹرکٹ رپورٹر)سیکرٹری سوشل ویلفیئر پنجاب ظہورحسین نے اولڈ ایج ہوم کا دورہ کیا اوروہاں مقیم بزرگوں کے لئے دستیاب سہولیات کا جائزہ لیا۔ڈائریکٹر سوشل ویلفیئر مزمل یار،ڈپٹی ڈائریکٹر آمنہ عالم، انچارج عافیت رابعہ ودیگر بھی موجود تھے۔سیکرٹری سوشل ویلفیئر پنجاب نے بزرگوں سے پیاروشفقت کا اظہار کرتے ہوئے کہا کہ اگرچہ وہ کسی گھریلو مسائل کے باعث عافیت میں مقیم اوراپنے پیاروں سے دورہیں لیکن حکومت انہیں تنہانہیں چھوڑے گی۔انہوں نے کہا کہ معاشرے کی سختیوں کے ستائے ہوئے افرادکی بھلائی کیلئے ہمیں وسائل اور وقت کی قربانی سے دریغ نہیں کرنا چاہیے۔انہوں نے انچارج اولڈ ایج ہوم سے کہا کہ وہ مقیم عمر رسیدہ کی ضروریات کا ہر ممکن خیال رکھیں اور انہیں گھر جیسا ماحول میسر ہونا چاہیے تاکہ وہ کسی لمحہ بھی اداس نہ ہوں اور اپنی مرضی سے زندگی گزار سکیں۔انچارج ادارہ نے بزرگوں کو فراہم کی جانے والی سہولیات سے آگاہ کیا۔
