فیصل آباد ڈویژن میں ای رجسٹریشن سہولت کا آغاز ہو گیا 

فیصل آباد(ڈسٹرکٹ رپورٹر)فیصل آبادڈویژن میں پنجاب لینڈ ریکارڈ اتھارٹی کی جانب سے رجسٹری بذریعہ ای رجسٹریشن کی سہولت کا آغاز کردیا گیا ہے۔ای رجسٹریشن کی آگاہی بارے اسسٹنٹ کمشنرز وریونیو افسران و سٹاف کی ٹریننگ میونسپل کارپوریشن ہال میں منعقد ہوئی۔کمشنرسلوت سعیدنے ڈویژن میں ای رجسٹریشن کے حوالے سے تربیتی سیشن کا افتتاح کیا اور کہا کہ حکومت پنجاب نے عوام کو گھر بیٹھے ای رجسٹریشن کی سہولت فراہم کی ہے۔ای رجسٹریشن کے لئے ویب پورٹل بنایا گیا ہے۔ای رجسٹریشن کی بدولت جعل سازی کا خاتمہ ہو گا۔انہوں نے کہا کہ گڈ گورننس کیلئے عوام کی شمولیت اور انفرادی ذمہ داری کو یقینی بنایا گیا ہے۔ صارفین ای سٹمپ ویب پورٹل سے چالان حاصل کریں گے اوربینک آف پنجاب میں مقررہ فیس کی ادائیگی کے بعد صارفین گھر بیٹھے وثیقہ لکھ سکیں گے اسی طرح صارفین خود سے بائع مشتری اور گواہان کا اندراج کر سکیں گے۔وثیقہ لکھنے کے بعد ڈیجیٹل طریقے سے سب رجسٹرار کو منتقل ہو سکے گا۔صارفین مقررہ وقت پر سب رجسٹرار کے سامنے بائیو میٹرک تصدیق اور بیانات قلمبند کرائیں گے۔کمشنر نے کہا کہ بیانات کی تصدیق کے بعد منظور شدہ رجسٹری نقل حاصل کی جا سکے گی۔ضلعی انتظامیہ،اسسٹنٹ کمشنرز،سب رجسٹرار،اسٹمپ وینڈرز کے لیے صوبہ بھر میں ٹریننگ پروگرام ترتیب دیئے گئے ہیں۔ضلعی افسران اسسٹنٹ کمشنرز،سب رجسٹراراور اسٹمپ فروشوں نے ای رجسٹریشن کے حوالے سے ٹریننگ میں شرکت کی۔ٹریننگ سیشن میں سوال جواب کا سیشن بھی رکھا گیا۔نظام میں جدید اصلاحات شفاف اور سہولت کے ساتھ ملے گی۔صارفین کی سہولت یہ بہت بڑی کامیابی ہے۔تربیتی ورکشاپ میں ڈویژن بھر سے افسران نے شرکت کی اور کہا کہ سروس ڈلیوری میں رجسٹریشن کا نظام بہت اہم ہے اور ڈیجیٹلائزیشن کی بدولت جدت آئے گی۔دفاتر میں بھی اس عمل سے شفافیت آئے گی۔لوگوں کو مزید سہولیات ملیں گی۔ڈویژن میں اس نظام کو کامیاب بنانا ہے۔ورکشاپ میں ڈویژن بھر سے ایڈیشنل ڈپٹی کمشنر ریونیو، اسسٹنٹ کمشنرز اور ریونیو افسران بھی موجود تھے۔