عظیم روحانی و علمی شخصیت، جانشین امام الہدیٰ سید جاوید حسین شاہ انتقال کرگئے

فیصل آباد (نمائندہ ایف ٹی وی) عظیم روحانی و علمی شخصیت، جانشین امام الہدیٰ حضرت پیر سید جاوید حسین شاہ 76 سال کی عمر میں 3 مئی 2024 بروز جمعہ کو عشاء کے بعد قضائے الٰہی سے انتقال فرما گئے۔ ﺇﻧَّﺎ ﻟِﻠّٰﻪ ﻭﺇﻧَّﺎ ﺇﻟَﻴْﻪِ ﺭَﺍﺟِﻌُﻮْﻥ مخدوم زادہ سید زکریا شاہ و انتظامیہ خانقاہ عبیدیہ کے مطابق نماز جنازہ 5 مئی بروز اتوار سہ پہر تین3 بجے پہاڑی والی گراونڈ فوارہ چوک نزد دارالعلوم فیصل آباد ہوگا۔ سید جاوید حسین شاہ شیخ الحدیث جامعہ عبیدیہ فیصل آباد، خانقاہ عبیدیہ، دنیا بھر میں لاکھوں مریدین کے روحانی پیشواء اور جمیعت علماء اسلام ف پنجاب کے رہنما مخدوم زادہ سید محمد زکریا شاہ کے والد گرامی تھے۔ انہیں چاروں سلاسل طریقت میں خلافت و اجازت بیعت حاصل تھی۔ حضرت امام لاہوری رح کے مداح جبکہ مفسر قرآن حضرت مولانا عبیداللہ انور رح کے خلیفہ مجاز تھے۔ حضرت بہلوی رح، حضرت خواجہ خان محمد رح، حضرت علی مرتضیٰ ڈیروی رح، حضرت مفتی عبدالستاررح، حضرت سید نفیس الحسینی رح سمیت متعدد اہل اللہ کے جانشین تھے۔ انہوں نے پوری زندگی درس و تدریس اور احکام شریعت کی پاسداری و اشاعت میں گزاری۔ ہر بدھ کو خانقاہ عبیدیہ علامہ اقبال ٹاون میں مجلس ذکر کرواتے اور سالکین کو وعظ فرماتے تھے۔ ان کے ملفوظات کی درجنوں کتابیں شائع ہوئیں۔ ان کے وعظ پر مشتمل کئی جلدوں پر مشتمل کتاب مجالس ذکر بھی مریدین میں مقبول ہے. سید جاوید حسین شاہ صاحب نے بیوہ کے علاوہ اکلوتے فرزند سید زکریا شاہ، تین بیٹیاں،تین داماد، پوتے بوتیاں، نواسے نواسیاں، ہزاروں شاگرد، لاکھوں مریدین سوگوار چھوڑے ہیں۔ حضرت جی سید جاوید حسین شاہ صاحب یکم جنوری 1948 کو پیدا ہوئے۔ ٹوبہ ٹیک سنگھ کے گاوں کلوئیا میں ابتدائی زندگی گزاری۔مختلف مدارس میں علوم نبویہ کے حصول کیلیے داخل رہے۔ جامعہ دارالعلوم فیصل آباد میں تدریس کی جبکہ سلسلہ قادریہ راشدیہ شیرانوالہ لاہور میں حضرت مولانا عبیداللہ انور رح کے خلیفہ مجاز ہوئے اور جانشین ثابت ہوئے۔ دورہ تفسیر کے ماہر تھے۔ آپ تقریباْ اڑھائی سال سے ہر ہفتے میں اکثر تین دفعہ گردوں کی صفائی ڈائلاسز کرواتے تھے۔ دل کا بائی پاس بھی ہو چکا تھا۔ بستر علالت پر بھی معمولات جاری تھے۔ انہیں 3مئی کو جمعہ کی شب عشاء کی نماز کے بعد معمولی طبیعت خراب ہوئی مگر جانبر نہ ہو سکے اور جامعہ عبیدیہ فیصل آباد میں ہی انتقال فرما گئے۔