فیصل آباد(نمائندہ ایف ٹی وی) فیصل آباد پریس کلب کے زیر اہتمام ڈپٹی کمشنر محمد علی کے والدمحترم حاجی محمد خالق خلیق کے ایصال ثواب کے لئے تعزیتی ریفرنس و دعائیہ تقریب پریس کلب میں منعقد ہوئی جس میں اسسٹنٹ کمشنر صدر عمر مقبول،صدر پریس کلب غلام عباس تنویر،گروپ لیڈر شاہد علی اور سیکرٹری ساجد خان کے علاوہ ایگزیکٹو ممبران نے شرکت کی۔اس موقع پر مرحوم کے درجات کی بلندی اور پسماندگان کے لئے صبر جمیل کی دعا کی گئی۔تعزیتی ریفرنس سے اظہار خیال کرتے ہوئے ڈپٹی کمشنر نے پریس کلب کی انتظامیہ اور ارکان کا شکریہ ادا کیا اور والد گرامی کی زندگی کے چند یادگار پہلوؤں پر روشنی ڈالی۔ انہوں نے بتایا کہ اردو کے لیکچرار تھے اور رائٹر بھی تھے۔انہوں نے کہا والد جب تک حیات رہے ان کی ہر معاملہ میں سپورٹ حاصل رہی۔انہوں نے کہا نبی کریم صلی اللہ علیہ والہ وسلم نے فرمایا تواورتیرا مال تیرے باپ کا ہے۔والد کی دعا دل سے نکلتی ہے۔انہوں نے کہا کہ جن کے والدین زندہ ہیں ان کی خدمت کریں جو جہاں فانی سے کوچ کرگئے ہیں ان کے ایصال ثواب کے لئے دعا کریں۔تعزیتی ریفرنس سے صدر پریس کلب،گروپ لیڈر اور سیکرٹری نے بھی اظہار خیال کیا اور کہا کہ مرحوم خداترس انسان تھے جنہوں نے اپنی زندگی دکھی انسانیت کی خدمت میں وقف کی۔وہ نماز،روزہ کے پابند اورعظیم صفات کے مالک تھے جن کی کمی ہمیشہ رہے گی۔انہوں نے ڈپٹی کمشنر کے والد محترم کے درجات کی بلندی کی بھی دعا کی۔دیگر مقررین نے بھی مرحوم کی سماجی خدمات کو خراج عقیدت پیش کیا۔
