فیصل آباد(ڈسٹرکٹ رپورٹر)ایف ڈی اے کے زیر اہتمام ٹیپا، ٹریفک پولیس و دیگر اداروں کے اشتراک سے شہر میں ٹریفک سسٹم کو منظم بنانے کے ا قدامات کے تحت ابتدائی طور پر چار منتخب شاہرات کو ماڈل بنانے کا فیصلہ کیاگیاہے اس سلسلے میں فوری طو رپر مشترکہ سروے شروع کرکے ٹریفک بہاؤ کو آسان بنانے اور شہریوں کی آگاہی کیلئے درکار تقاضوں کا جائزہ لیاجائیگا۔ اس امر کا فیصلہ ڈائریکٹر جنرل ایف ڈی اے محمد آصف چوہدری کی زیر صدارت منعقدہ اجلاس میں کیاگیا جس میں ٹیپا اور ٹریفک پولیس کے اشتراک عمل کو آگے بڑھانے کے مختلف امور اورٹریفک انجینئرنگ کے حوالے سے منصوبہ سازی کا جائزہ لیاگیا۔ اجلاس میں ایڈ یشنل ڈائریکٹرجنرل عابد حسین بھٹی، چیف ٹریفک آفیسر مقصود احمد لون، چیف انجینئر مہرایوب گجر، ڈی ایس پی ٹریفک خالد علیم، ڈائریکٹرایڈمن ٹیپا سہیل مقصود پنوں، ڈپٹی ڈائریکٹر ز ٹیپا عمیر اصغر، ولید خالد اور دیگر افسران نے شرکت کی۔ کنسلٹنٹ ٹیپا محمد کامران نے ٹریفک سٹڈی، سڑک حادثات کے ریکارڈ کا تجزیہ اورانسدادی اقدامات کے علاوہ ٹریفک قوانین سے آگاہی کیلئے مجوزہ پروگرام کے بارے میں بریفنگ دی۔ ڈائریکٹر جنرل ایف ڈی اے نے شہر میں ٹریفک کے گھمبیر مسائل کا ذکرکرتے ہوئے کہاکہ ٹریفک مینجمنٹ سسٹم کو شہری ضرورتوں کے مطابق بنانے کیلئے ٹھوس لائحہ عمل مرتب کیاجارہاہے جس کے تحت مرحلہ وار پروگرام کے تحت منصوبہ جات مکمل کرکے ڈویژنل و ضلعی انتظامیہ کے اشتراک سے ٹریفک پلان کو کامیاب بنائیں گے اس سلسلے میں ٹیپا ٹریفک، میٹرو پولیٹن کارپوریشن، پنجاب ہائی ویز پولیس، ریسکیو 1122۔اور دیگر متعلقہ اداروں کے اشتراک کو مضبوط بناکر ٹریفک سسٹم کو دیرپا بنیادوں پراستوار کرینگے۔ اجلاس کے دوران فیصلہ کیاگیاکہ ابتدائی طور پر کینال روڈ، ستیانہ روڈ، سمندری روڈ اور جڑانوالہ روڈ کی ری ماڈلنگ کرکے ان پر ٹریفک سگنلز، یوٹرن، سپیڈ بریکرز، ٹریفک سائن بورڈز کی تنصیب، روڈ مارکینگ اور ٹریفک مینجمنٹ کے دیگر تقاضوں کو پورا کرکے شہریوں کو بہتر سروسز فراہم کرینگے۔ علاوہ ازیں شہر میں ٹریفک کے حوالے سے مسائل زدہ چوکوں، سڑکوں، انڈر پاسز اوور ہیڈ برج اوردیگر اہم شاہرات پر پیش آمدہ مسائل کوسائنسی بنیادوں پرحل کیا جائیگا۔ڈائریکٹر جنرل ایف ڈی اے نے کہاکہ شہر میں ٹریفک مسائل حل کرنے کیلئے پرعزم ہیں اس سلسلے میں ٹریفک انجینئرنگ اینڈ پلاننگ کیلئے ٹیپا کے افسران متحرک انداز میں ٹریفک پولیس کی معاونت کرینگے۔ سی ٹی او مقصود احمد لون نے ٹریفک کنٹرول سسٹم میں درپیش مسائل کا ذکر کرتے ہوئے کہا کہ ٹریفک سنگلز کو چالو رکھنے، تجاوزات کے خاتمے، گاڑیوں کی پارکنگ سمیت دیگر انتظامات کیلئے متعلقہ اداروں کی مشترکہ منصوبہ بندی ضروری ہے۔ انہوں نے بتایاکہ ٹریفک ایجوکیشن پروگرام تسلسل کے ساتھ جاری ہے تاہم ٹریفک قوانین پر رضاکارانہ عملدرآمد کیلئے شہری تعاون ناگزیر ہے لہٰذا شہریوں کو چاہیے کہ مہلک حادثات سے بچنے کیلئے موٹر سائیکل چلاتے وقت ہیلمٹ ضرور پہنیں اوردیگر ٹریفک قوانین کی شعوری انداز میں پابندی کی جائے۔کنسلٹنٹ ٹیپا محمد کامران نے ٹریفک امپکیٹ سٹڈی،گائیڈ لائنز، روڈ سیفٹی ٹریفک ورکشاپس کے اانعقاد، شاہرات، چوکس کے ٹریفک تجزیہ اور تعلیمی اداروں میں روڈ سیفٹی آگاہی مہم سمیت روڈز انجینئرنگ اینڈ پلاننگ کے لئے مقرر کردہ ٹائم لائنز سے آگاہ کیا اور کہااس سلسلے میں جامع پلان تیار کرکے جلد ایف ڈی اے کے حوالے کیاجائیگا۔
