فیصل آباد(نمائندہ ایف ٹی وی) چیف ایگزیکٹوفیسکوارشد منیر نے کہا ہے کہ شہید کی موت قوم کی حیات ہے فیسکو کی جانب سے دوران ڈیوٹی چالو لائنوں پر کام کرتے ہوئے شہید ہونیوالے اور دوران ملازمت وفات پانے والے ملازمین کے بچوں کو فوری ملازمت دینے کی درخشاں روایت جاری رہے گی۔ کمپنی کی بہتری کیلئے اپنے جانیں قربان کرنے والے ملازمین قابل فخر ہیں۔اِن خیالات کا اظہار انہوں نے37 فیسکوملازمین کے بچوں کو تقررنامے (Appointment Letters)دینے کی ایک تقریب سے خطاب کرتے ہوئے کیا۔انھوں نے مزید کہا کہ نئی نسل سے ہمیں بہت سی توقعات وابستہ ہیں لہذا ملک و قوم کی خدمت اور کمپنی کی بہتری کیلئے اپنی جان لڑا دیں اورصارفین کی خدمت کو اپنا شعار بنائیں۔ نئے بھرتی ہونے والے نوجوان ملازمین پورے جذبہ کے ساتھ خدمتِ خلق کی پالیسی پر عمل پیرا رہیں۔ چیف ایگزیکٹو نے نئے بھرتی کئے جانے والے ملازمین کو تلقین کی کہ آئندہ زندگی میں اپنا کا م محنت،ایمانداری اور لگن سے کر یں اور محکمہ کی نیک نامی اور وقار کا باعث بنیں۔اس موقع پر جی ایم آپریشن احسان الٰہی، چیف کمرشل آفیسر اللہ یارخان، ایڈیشنل ڈی جی ایچ آراینڈ ایڈمن دولت علی ہرل نے بھی خطاب کیا اور نئے بھرتی ہونے والے ملازمین کو تاکید کی کہ زندگی میں فرائض کی ادائیگی کو ہمیشہ فوقیت دیں اور نیک نامی کمائیں۔ڈائریکٹر جنرل ایچ آراینڈ ایڈمن بحرکرم نے خطاب کرتے ہوئے کہا کہ آپ لوگ اپنے مرحوم والدین کی وجہ سے بھرتی کئے گئے ہیں لہذا ایمانداری سے فرائض کی بجا آوری کر کے ان کیلئے صدقہ جاریہ بنیں اور اپنی والدہ اور بہن بھائیوں کی خدمت بھی جاری رکھیں اور ہمیشہ یاد رکھیں کہ آپ کی وجہ سے اگر کسی ایک انسان کو بھی تکلیف پہنچی تو آپ کو دُنیا اور آخرت میں اس کا کڑا حساب دینا پڑے گا۔ بعدازاں چیف ایگزیکٹو فیسکوارشد منیر، ڈی جی ایچ آر بحرکرم، جی ایم آپریشن احسان الہٰی اور سی سی او اللہ یارخان نے مرحوم ملازمین کے نئے بھرتی ہونے والے بچوں میں تقرر نامے تقسیم کئے۔ تقریب میں ڈپٹی ڈائریکٹر پی آر سعید رضا، سٹاف آفیسر عابد رشید اوراسسٹنٹ ڈائریکٹر ایچ آر اینڈ ایڈمن نذر محمد اور فیسکو ملازمین اورافسران کی کثیر تعداد نے شرکت کی۔
