سویڈن میں قرآن پاک کی بے حرمتی کیخلاف پاکستان مرکزی مسلم لیگ کا احتجاجی مظاہرہ

فیصل آباد (حمزہ اکرم) سویڈن میں قرآن پاک کی بے حرمتی کیخلاف پاکستان مرکزی مسلم لیگ فیصل آباد کی طرف سے جی ٹی ایس چوک تا ضلع کونسل چوک تک احتجاجی ریلی نکالی گئی اور اور بعد ازاں ضلع کونسل چوک میں احتجاجی مظاہرہ کیا گیا۔ جس میں شہر بھرسے بڑی تعداد میں عوام نے شرکت کی۔احتجاجی مظاہرے میں فیصل آباد کی مختلف تاجر، مزدور، طلبا، نوجوانوں کی تنظیموں اور سول سوسائٹی نے بھی شرکت کی۔ شرکاء نے ہاتھوں میں کتبے اٹھا رکھے تھے جن پر قرآن پاک کی محبت پر مبنی اور اس واقعے کے خلاف مذمتی الفاظ درج تھے۔ مظاہرین نے قرآن کریم کی محبت اور سویڈن کی مذمت میں شدید نعرے بازی کی۔ مظاہرین سے ایڈووکیٹ چوہدری قیصر ہارون طور رہنما پاکستان مرکزی مسلم لیگ فیصل آباد، شیخ عارف سلمان رہنما پاکستان تحریک انصاف فیصل آباد، میاں محمد اشفاق ایڈووکیٹ پاکستان کشمیر لائرز فورم، چوہدری دلبر حمید بل ایڈووکیٹ، محمد نواز چیمہ رہنما پاکستان مرکزی مسلم لیگ، مولانا زاہد محمود قاسمی پاکستان علماء کونسل، مفتی ضیاء مدنی، علامہ پیر زادہ عرفان جاوید قادری چیئرپرسن سنی علماء کونسل اور دیگر سیاسی و سماجی شخصیات نے خطاب کیا۔ مظاہرے کے شرکاء سے گفتگو کرتے ہوئے ایڈووکیٹ چوہدری قیصر ہارون طور نے کہا کہ یورپی ممالک میں مسلمانوں کی دل آزاری کے پے در پے واقعات انتہائی تشویشناک ہیں۔ یورپی ممالک کو اس رجحان کو ختم کرنا چاہیے کیونکہ قرآن کریم اللہ کا کلام ہے اور مسلمان دل و جان سے اس سے محبت کرتے ہیں۔ انہوں نے کہا کہ قرآن کریم کو جلایا جانا کوئی آزادی اظہار رائے نہیں بلکہ کھلی دہشت گردی ہے جس کی ہر فورم پر نا صرف مذمت بلکہ ایسے واقعات کو عملاً روکا جانا چاہیے۔ انہوں نے کہا پاکستان مرکزی مسلم لیگ اس کی شدید الفاظ میں مزمت کرتی ہے۔ ہم ان اقدامات کے خلاف اقوام متحدہ اور انسانی حقوق کے دیگر اداروں پر اس آواز کو اٹھائیں گے۔ محمد نواز چیمہ نے کہا کہ پاکستان مرکزی مسلم لیگ بانی پاکستان کے قول کے مطابق انسانی حقوق اور مذہبی آزادی پر یقین رکھتی ہے۔ ہر انسان کو اپنے مذہب پر عمل کا حق اور آزادی حاصل ہے کسی انسان کی دل آزاری تمام مذہبی اقدار اور عالمی قانون کی نفی ہے یورپ اس بات پر یقین کا دعویٰ کرتا ہے مگر مسلمانوں کی دل آزاری کے واقعات ان کی منافقت کو عیاں کررہے ہیں۔