فیصل آباد میں ڈاکوؤں نے ایک بار پھر ڈلیوری بوائے سے پیزا چھین لیا۔
پیزے کے شوقین ڈاکوؤں کی یہ چوتھی واردات گزشتہ ڈیڑھ ماہ میں سامنے آئی ہے، تاہم پولیس اب تک ملزمان کو گرفتار کرنے میں ناکام رہی ہے۔
پولیس کے مطابق تھانہ مدینہ ٹاؤن کے قریب موٹرسائیکل پر سوار دو ڈاکوؤں نے ڈلیوری بوائے کو لوٹ لیا۔
امان اللہ نامی ڈلیوری بوائے کی جانب سے درج کروائی گئی ایف آئی آر میں بتایا گیا کہ ڈاکو اس سے پیزا، پیزا بیگ، موبائل فون اور تین ہزار روپے چھین کر فرار ہو گئے۔
پولیس نے تھانہ مدینہ ٹاؤن میں مقدمہ درج کر کے تحقیقات شروع کر دی ہیں۔
واضح رہے کہ اس سے قبل بھی پیزا چھیننے کی تین وارداتیں تھانہ صدر اور مدینہ ٹاؤن کے علاقوں میں ہو چکی ہیں، مگر پولیس اب تک ان ڈاکوؤں کا سراغ نہیں لگا سکی۔
