فیصل آباد کے آٹھ بازار

محمد ذیشان، فیصل آباد

پوری دنیا میں شہر فیصل آباد کی پہچان گھنٹہ گھر کی عمارت سے مشروط رہی ہےاور اس عمارت کے ارد گرد آٹھ بازار اپنے آپ ميں ایک مکمل کہانی رکھتے ہیں لیکن بہت کم لوگوں کو ان بازاروں کی کاروباری مرکزیت اور خصوصیت کا علم ہے۔ ویسے تو مجموعی طور پر شہر فیصل آباد ایک ٹیکسٹائل انڈسٹری کے طور پر مشہور ہے، تا ہم اس کے آٹھ بازاروں میں منفرد نوعیت کے کاروبار پورا سال کیے جاتے ہیں. نہ صرف ان بازاروں میں بلکہ ان سے متصل بازار، جن کو گول بازار کہا جاتا ہے، ان میں بھی روزانہ کی بنیاد پر کروڑوں کا کاروبار کیا جاتا ہے۔
جیسا کہ جھنگ بازار سے ہر نوعیت کی چیز دستیاب ہوتی ہے تا ہم رات گئے تک یہاں سے پھل مل سکتا ہے. اس کے علاوہ سری پاے، کلیجی، مچھلی اور شادی کے لئے بد بھی وافر مقدار میں ہوتی ہے جبکہ اس کے گول بازاروں میں پلاسٹک کی اشیا، بچوں کے کھلونے اور انار کلی مارکیٹ بھی شامل ہیں۔ جھنگ بازار کے ساتھ بھوانہ بازار سے الیکٹرانکس اور الیکٹریکل اشیا کی تھوک مارکیٹ موجود ہے، باقی انارکلی سے منسلک ہونے کی وجہ سے کپڑے کی دکانیں بھی موجود ہیں۔بھوانہ بازار کے ساتھ امیں پور بازار کتابوں، سٹیشنری اور سجاوٹ کی اشیا کے حوالے سے پورے شہر میں ممتاز مقام رکھتا ہے. جبکہ اس سے منسلک سرکلر روڈ فریج، ٹی وی اور ٹیلی کمیونیکیشن سے متعلق اشیا کی خرید و فروخت کی وجہ سے اہمیت رکھتا ہے۔ امیں پور کے ساتھ چنیوٹ بازار میڈیکل فیلڈ اور ہومیو ادویات کے حوالے سے مشہور و معروف ہے. کچہری بازار موبائل سے منسلک بازار ہے اور اس کی اہمیت کچہری اور پریس کلب کی موجودگی کی وجہ سے بھی بڑھ جاتی ہے جبکہ سپورٹس سے متعلق مارکیٹ بھی یہی موجود ہے۔
ریل بازار میں سنار کی مارکیٹ موجود ہے جبکہ ڈرائی فروٹ کی مارکیٹ آنے والوں کو دل کھول کر خوش آمدید کہتی ہے. کارخانہ بازار میں سڑک پر کاروباری معاملات کرنے والوں کو عام لوگ سمجھنے کی کوشش بھی نہ کیجئے گا. کیونکہ یہاں کروڑوں روپوں کا سوتر کا لین دین طےکیا جاتا ہے. باقی لوہے کی بنی گھریلو استعمال کی اشیاء بھی موجود ہوتی ہیں۔ آخر میں منٹگمری بازار نے بچوں کے ڈایپر کی بڑھتی ہوئی مانگ کی بدولت ایک تھوک مارکیٹ کی شکل اختیار کر لی ہوئی ہے جبکہ ابھی بھی یہاں سے کاسمیٹکس، آرٹی فیشل جیولری اور میک اپ کا سامان بکثرت اور بارعایت دستیاب ہوتا ہے۔ فیصل آباد کے آٹھ بازار اپنے آپ ميں ایک منفرد مقام رکھتے ہیں جبکہ کاروبار کرنے والے نوجوانوں کو بھی ایک پلیٹ فارم کی سہولت فراہم کرنے میں پیش پیش ہیں۔آپ سب کو ضرور یہ جگہ دیکھنی چاہیے یہی تو فیصل آباد کا حسن ہے۔

محمد ذیشان کا تعلق فیصل آباد سے ہے اور والنٹیئر فورس پاکستان کے سینئر وائس پریزیڈنٹ ہے ۔ لکھاری سے رابطہ کے لیے @Zeeshanvfp