قربانی کے جانوروں کی خریدوفروخت کے لئے 12عارضی سیل پوائنٹس قائم

فیصل آباد(نمائندہ ایف ٹی وی)ضلع میں قربانی کے جانوروں کی خریدوفروخت کے لئے 12عارضی سیل پوائنٹس قائم کئے جارہے ہیں جو عید سے ایک ہفتہ قبل فنکشنل ہونگے جبکہ صفائی ستھرائی کو برقرار رکھنے اورماحولیاتی تحفظ کے لیے قربانی کے جانوروں کو شہری حدود میں لانے پر پابندی عائد ہوگی اور خلاف ورزی کی صورت میں بیوپاریوں کے جانور ضبط کرلئے جائیں گے۔عیدالاضحی کے سلسلے میں قربانی کے جانوروں کی خریدوفروخت کے لئے سیل پوائنٹس کے قیام کے ضروری امور کاجائزہ لینے کے سلسلے میں ایک اجلاس ڈی سی آفس میں منعقد ہوا جس کی صدارت ڈپٹی کمشنر محمد علی نے کی۔اجلاس میں اسسٹنٹ کمشنرز، چیف آفیسرز لوکل گورنمنٹ،لائیوسٹاک،پنجاب پولیس،ٹریفک پولیس،صحت،ٹرانسپورٹ،ویسٹ مینجمنٹ کمپنی،پارکنگ کمپنی اوردیگر محکموں و اداروں کے افسران نے شرکت کی۔ڈپٹی کمشنر نے بتایا کہ قربانی کے جانوروں کی خریدوفروخت کے لئے شہر میں ماڈل کیٹل مارکیٹ کمپنی کی طرف سے ماڈل کیٹل مار کیٹ نیاموآنہ سمندری روڈ،تحصیل صدر میں چک 117ج۔ب دھنولہ ملت روڈ،چک 241 ر۔ب چینچل سنگھ والا،چک 239ر۔ب خانوآنہ ستیا نہ روڈ،چک195 ر۔ب اور مویشی منڈی خان پارک ڈجکوٹ، جڑانوالہ میں چک 126 گ۔ب نزد شیروآنہ پل،چک 194 ر۔ب نزد یو ای ٹی کیمپس کھرڑیانوالہ مکوآنہ بائی پاس،سمندری میں نئی سبزی منڈی سے متصلہ فیصل آباد روڈ،میونسپل کمیٹی تاندلیانوالہ میں مویشی منڈی ہاکی گراؤنڈ کینال روڈ،بنگلہ چوک بکر منڈی ماموں کانجن،مویشی منڈی چک 423 گ۔ب بالمقابل پنجاب کالج ستیانہ روڈتاندلیانوالہ اور چک جھمرہ میں سپورٹس کمپلیکس چک نمبر 187 ر۔ب میں عارضی سیل پوائنٹس لگائے جارہے ہیں۔انہوں نے تمام متعلقہ محکموں سے کہا کہ وہ سیل پوائنٹس پر بیوپاریوں اور خریداروں کے لئے ضروری سہولیات کو فوری مکمل کرکے رپورٹ کریں۔انہوں نے سیل پوائنٹس پر بیوپاریوں کے لئے فری ٹیسٹ سروس،جانوروں کے لئے انکلوژرز،عوامی آگاہی کے لئے نمایاں جگہوں پر بینرز،میڈیکل کیمپ کا قیام،کورونا،ڈینگی اور کانگو وائرس سے بچاؤ کے انتظامات،ویٹرنری ڈسپنسری،پینے کا پانی، لائٹنگ، عارضی پولیس چیک پوسٹ،سیکورٹی،پارکنگ،صفائی ستھرائی،شکایت سیل،ٹائلٹس،کنٹرول رومزاوردیگر ضروری انتظامات مکمل کرنے کے لئے متعلقہ محکموں کو اہداف تفویض کئے۔