خواتین پر چوری کا الزام لگاکر بے حرمتی کرنے کی اجازت کوئی مذہب نہیں دیتا۔صوبائی وزیر انسانی حقوق

فیصل آباد(حمزہ اکرم)صوبائی وزیر انسانی حقوق اعجاز عالم آ گسٹین نے فیصل آباد میں کچھ خواتین کی بے حرمتی اور عزتیں پامال کر نے کے واقعہ کا نوٹس لیتے ہوئے سی پی او فیصل آباد کو بذریعہ ٹیلی فون ملزمان کو فی الفور گرفتار کرکے سخت سے سخت سزا اور خواتین کو تحفظ فراہم کرنے کی ہدایت کرتے ہوئے کہا کہ تحریک انصاف کے دور حکومت میں انسانی حقوق کی اس طرح سے خلاف ورزی ہرگز برداشت نہیں کی جائے گی۔ انہوں نے کہا کہ خواتین پر چوری کا الزام لگاکر اس طرح بے حرمتی کرنا قطعی طور پر کسی بھی مہذب معاشرے کی عکاسی نہیں کرسکتا۔صوبائی وزیر انسانی حقوق نے کہا کہ اس طرح کی جاہلانہ حرکتوں سے خواتین کے حقوق کو پامال نہں کرنے دیں گے۔ سٹی پولیس آفیسر ڈاکٹر محمد عابد نے صوبائی وزیر کو بریفنگ دیتے ہوئے بتایا کہ واقعہ میں ملوث تین مرکزی ملزمان کو گرفتار کیا جا چکا ہے جبکہ باقی ملزمان کی گرفتاری کے لئے چھاپے مارے جا رہے ہیں۔ انہوں نے صوبائی وزیر کو یقین دلایا کہ ملزمان کو کڑی سزا دلوائی جا سکے گی تاکہ انسانی حقوق کی حفاظت یقینی بنا جا سکے۔