فیصل آباد(محمد حمزہ)کمشنر سلوت سعید سے صدر چیمبرآف کامرس اینڈ انڈسٹریز ڈاکٹرخرم طارق کی سربراہی میں وفد نے کمشنر آفس میں ملاقات کی۔کمشنر نے وفد کا خیر مقدم کرتے ہوئے چیمبر آف کامرس کو جشن بہاراں میں بھرپور شرکت کی دعوت دی۔انہوں نے بتایا کہ فیصل آباد میں جشن بہاراں کو بھرپور انداز میں منانے کی تیاریاں عروج پر ہیں اور تقریبات کا شاندار انعقاد کرکے شہریوں کو تفریح فراہم کریں گے۔کمشنر نے فیصل آباد انڈسٹریل اسٹیٹ ڈویلپمنٹ اینڈ مینجمنٹ کمپنی میں چائینز کی فول پروف سیکیورٹی کے لئے ڈویژنل وپولیس انتظامیہ کی طرف سے کئے جانے والے اقدامات سے بھی تفصیلی آگاہ کیا۔انہوں نے ترکیہ وشام میں ہولناک زلزلہ سے متاثرہ افراد کی امداد وبحالی میں چیمبر آف کامرس کی جاری کاوشوں کو سراہا اور کہا کہ فیصل آباد کے مخیر حضرات مصیبت میں گھرے افرادکی امداد کے لئے ہمیشہ صف اول میں رہے ہیں۔انہوں نے بتایا کہ چیمبر آف کامرس سے ملحقہ روڈ پر ٹریفک،آٹھ بازاروں میں تجاوزات کے صفایا کے لئے ہنگامی اقدامات کئے جارہے ہیں جبکہ صنعتکاروں کو درپیش مسائل کے حل میں بھی سنجیدہ ہیں۔انہوں نے چیمبرآف کامرس کی طرف سے وومن امپاورمنٹ پر موثر انداز میں عملدرآمد کو سراہا۔صدر ایوان صنعت وتجارت نے مسائل کے حل میں واضح پیشرفت پر کمشنر سلوت سعید کا شکریہ ادا کرتے ہوئے کہا کہ ان کے چارج سنبھالنے کے بعد فیصل آبادتیزی سے مسائل سے پاک ہورہا ہے۔انہوں نے ایئرپورٹ کی اپ گریڈیشن،فری لائسنسنگ ودیگر اقدامات سے آگاہ کیا اور عزم کو دہراتے ہوئے کہا کہ ترکیہ وشام کے زلزلہ زدگان کی امداد وبحالی کے لئے کاوشیں جاری رکھی جائیں گی جبکہ جشن بہاراں میں بھرپور شرکت کریں گے۔دریں اثناء کمشنر سلوت سعید نے یکم مارچ سے شروع ہونے والی ڈیجیٹل مردم شماری کے انعقاد کے حوالے سے اجلاس کی صدارت کی اور چاروں اضلاع کی انتظامیہ کو ضروری انتظامات فی الفور مکمل کرنے کی تاکید کی۔انہوں نے ڈپٹی کمشنرز آفس میں کنٹرول رومز فعال کرنے،ٹرانسپورٹیشن پلان کو فوری حتمی شکل دینے کی بھی تاکید کی۔
