فیصل آباد(محمد حمزہ) محکمہ لائیو سٹاک حکومت پنجاب کی جانب سے جشن بہاراں 2023ء کے سلسلے میں فیصل آباد ڈویژن کے زیر انتظام چک نمبر 253 ر۔ب میں 2 روزہ ” بھینس دودھ میلہ ” منعقد ہوا۔ جس میں ضلع بھر سے اعلیٰ نسل کی حامل بھینس کے درمیان دودھ دینے کا مقابلہ انعقاد پزیر ہوا۔ اس موقع پر ڈائریکٹر لائیو سٹاک فیصل آباد ڈویژن ڈاکٹر حیدر علی خان اورایڈیشنل و ڈپٹی ڈائریکٹرز نے بطور مہمان خصوصی جبکہ ویٹرنری سٹاف و ممبران کے علاوہ پروگریسیو بریڈرز چوہدری فرحان علی گجر سمیت اہل علاقہ کی کثیر تعداد نے شرکت کی۔ ان دنوں مویشی پال حضرات کو جانوروں کی فلاح و بہبود اور دیکھ بھال بارے مختلف آڈیو ویڈیو ڈاکومنٹریز کے ذریعے آگاہی اور ٹمپریچر فراہم کیا گیا۔ بھینس دودھ مقابلہ میں میاں سجاد حالی کی بھینس کاجل نے دو چوائی کے دوران 30.110 کلو گرام دودھ دے کر پہلی پوزیشن حاصل کر لی جبکہ محمد سلیمان ڈوگر کی بھینس شیرنی 29.540 کلو گرام دودھ دے کر دوسرے، چوہدری قربان وینس کی بھینس گاڈ گفٹ 26.45 کلو گرام دے کر تیسرے اور میاں سجاد حالی ہی کی بھینس نوا 26.015 کلوگرام دودھ کے ساتھ چوتھے نمبر پر رہی۔ میلے کے اختتام پر ڈائریکٹر لائیو سٹاک ڈاکٹر حیدر علی خان نے دودھ مقابلہ جات میں ونر مویشی پال حضرات کو شیلڈز، ٹرافیوں اور نقد انعامات سے نوازا۔ اس کے علاوہ میلے میں محکمہ لائیو سٹاک کے افسران و سٹاف ممبران کی بہترین کارکردگی پر تعریفی اسناد کے ساتھ حوصلہ افزائی کی گئی۔اس موقع پر ڈائریکٹر لائیو سٹاک ڈاکٹر حیدر علی خان کا کہنا تھا کہ اس طرح کے دودھ مقابلہ جات ملکی معیشت کیلئے آکسیجن کا کردار ادا کرتے ہیں۔انہوں مزید کہا کہ ایسے مقابلہ جات سے جانوروں میں دودھ کی پیداوار کو بڑھانے کی ترغیب اور جذبہ بڑھے گا جس سے ملکی ترقی میں مدد مل سکے گی۔
